ზუგდიდში მიმდინარე პროევროპული საპროტესტო აქციების მონაწილე, პარტია „დროას“ წარმომადგენელი მარიამ სიჭინავა ზუგდიდის რაიონული სასამართლოს მორიგ სხდომაზე ხალათით და ჩუსტებით მივიდა. მას ე.წ. ბალაკლავაც ეფარა, რომელიც სახეს უფარავდა და რომლის აქციაზე ტარებისთვისაც უკვე არაერთხელ დაჯარიმდა. „ყოველდღე მიწევს მისვლა და უკვე გავშინაურდი“, - ასე ახსნა მარიამ სიჭინავამ სასამართლოში თავისი პერფორმანსი. ადმინისტრაციული სამართალდარღვევისთვის, კონკრეტულად კი 22 იანვარს საპროტესტო აქციაზე "ბალაკლავის" ტარებისთვის, მოსამართლე ირაკლი აბშილავამ მარიამ სიჭინავას დღეს 2000-ლარიანი ჯარიმის გადახდა დააკისრა. სასამართლო სხდომის დასრულების შემდეგ სიჭინავა ისევ დაიბარეს პოლიციის სამმართველოში, სადაც სამართალდარღვევის მორიგი ოქმი გააცნეს. ამჯერადაც ედავებიან 23 იანვარს საპროტესტო აქციაზე სახის დამფარავი საშუალებით გამოცხადებას. როგორც სიჭინავა ამბობს, აქციაზე პიროტექნიკის გამოყენებისა და "ბალაკლავის" ტარების გამო ამ დრომდე ათი ოქმი გამოუწერა პოლიციამ. აქედან სასამართლომ საქმეების ნაწილი გაერთიანებულად განიხილა. აქტივისტის თქმით, ამ დარღვევებისთვის ჯამში ჯარიმის სახით 14 ათასი ლარი დაუგროვდა. იგი თანხის გადახდას პროტესტის ნიშნად არ აპირებს. „იქამდე, სანამ ხელახალი არჩევნები არ დაინიშნება და ყველა პოლიტპატიმარი არ გათავისუფლდება, ამ კანონს ვუცხადებ დაუმორჩილებლობას და ყოველდღე "ბალაკლავით" ვარ, თუმცა პოლიცია დღეგამოშვებით მაჯარიმებს. აი, დღეს, მაგალითად, ჩავიბარე გუშინდელ დარღვევაზე ოქმი. გუშინ "ბალაკლავა" ვერ ვიპოვე და კაშნე მქონდა შემოხვეული. ამის გამო დამაჯარიმეს“, - უთხრა რადიო თავისუფლებას ზუგდიდის პოლიციის სამმართველოს დატოვების შემდეგ მარიამ სიჭინავამ. „დროას“ წარმომადგენელს და კიდევ ორ აქტივისტს ადმინისტრაციულ სამართალდარღვევათა კოდექსის დარღვევისთვის - კერძოდ, აქციაზე "ბალაკლავის" ტარებისა და ფეიერვერკის გამოყენებისთვის - რამდენჯერმე დააკისრეს 2000 და 5000 ლარის ოდენობის ჯარიმა. მარიამ სიჭინავა იმავე მიზეზებით ორჯერ იყო დაკავებული და სასამართლომ ოჯახური მდგომარეობის გათვალისწინებით გაათავისუფლა პატიმრობიდან. მას სამართალდამცავები პოლიციისადმი დაუმორჩილებლობის მუხლითაც ედავებოდნენ, რაც 18 იანვარს გამართულ სასამართლო სხდომაზე მტკიცებულებებით ვერ დაადასტურეს და სასამართლომ ამ საქმეზე ადმინისტრაციული წარმოება შეწყვიტა. ადმინისტრაციულ სამართალდარღვევათა კოდექსში შესული ცვლილების შემდეგ, პიროტექნიკის და სახის დამფარავი საშუალების აქციაზე გამოყენებისთვის მოქალაქეთა დაჯარიმების პირველი შემთხვევები ზუგდიდში დაფიქსირდა. პროევროპული საპროტესტო აქციების მონაწილეები არ აღიარებენ ადმინისტრაციულ სამართალდარღვევათა კოდექსში შესულ ცვლილებებ...