გიორგი გახარია ფიქრობს, რომ თავდასხმის მიზანი მისი დაშინება იყო. „ბიძინა ივანიშვილმა დაკარგა როგორც რეპუტაცია, ისე ქართველი ხალხის ის მცირე ნდობა, რომელიც დარჩენილი ჰქონდა. ყველაფერს გავაკეთებ იმისთვის, რომ მან დაკარგოს ყველაზე ძვირფასი - ფული და ძალაუფლება“, - განაცხადა მან. „იმ დღეს მე გახლდით ბათუმში ჩვენი პარტიის წევრების სასამართლო პროცესზე. როდესაც დავბრუნდი სასტუმრო „შერატონში“, შესასვლელშივე დამხვდა რამდენიმე ჯგუფი, რომლებიც ილანძღებოდნენ, იგინებოდნენ და, ფაქტობრივად, ახორციელებდნენ თავდასხმას. ეს იყო ჯგუფურად ორგანიზებული, რასაც მოყვა ჩვენი შესაბამისი რეაგირება. იქვე ჩანდა, რომ ერთი ადამიანი ამ ყველაფერს იღებდა ტელეფონით, სასტუმროს „ლობი“ [ფოიე] დაცლილი იყო ადამიანებისგან, მათ შორის თანამშრომლებისგან. ეს ადამიანები უხერხულად მოძრაობდნენ, რომ შემემჩნია, რომ იყვნენ შეიარაღებული“, - თქვა გიორგი გახარიამ. მან დაადასტურა, რომ „ქართული ოცნების“ წევრს, დიმიტრი სამხარაძეს, ყავა შეასხა. „მას შემდეგ, რაც მოვახდინე რეაგირება - დარჩენილი ყავის ჭიქით „გავუმასპინძლდი“ - ამის შემდეგ ჯგუფურად თავს დამესხნენ. როგორც მითხრეს ექიმებმა, გონება დავკარგე... დღეს როგორც მიდის გამოძიება და როგორც იქცევა ზოგიერთი პროპაგანდისტული ტელევიზია, ფაქტია, რომ ისინი არ აპირებენ ამ საქმის სამართლიანად გამოძიებას... ამაზე და წინასწარ ორგანიზებულობაზე მიგვითითებს რამდენიმე რამ: ისინი იღებდნენ ამ ყველაფერს, რასაც იღებდნენ; ეს ყველაფერი აღმოჩნდა ერთი ტელევიზიის ეთერში; ფაქტია, რომ გაქრა კამერის ჩანაწერები“, - აღნიშნა გიორგი გახარიამ. три 14 იანვარს „ქართული ოცნების“ წარმომადგენლები ბათუმის სასტუმრო „შერატონში” ფიზიკურად გაუსწორდნენ ოპოზიციური პარტიის, „საქართველოსთვის“ ლიდერს, ყოფილ პრემიერსა და შს მინისტრს, გიორგი გახარიას. სამედიცინო შემოწმების შემდეგ გახარიას ცხვირის ძვლის მოტეხილობა და ტვინის შერყევა დაუდგინდა. ფაქტზე შსს-მ გამოძიება სისხლის სამართლის კოდექსის 126-ე, ძალადობის მუხლით დაიწყო. მოგვიანებით გამოძიება პროკურატურას გადაეცა. პირველი ცნობა, რომ ბათუმის სასტუმრო „შერატონში“ გიორგი გახარიას „ქართული ოცნების“ წარმომადგენლები დიმიტრი სამხარაძე, გიორგი მანველიძე და სხვები დაესხნენ თავს, 15 იანვარს, შუაღამის შემდეგ, ფეისბუკით გაავრცელა გამოცემა „მთის ამბების“ რედაქტორმა გელა მთივლიშვილმა. 14 იანვარს ბათუმის სასტუმრო „შერატონში“ დიმიტრი სამხარაძე და სხვა პირები ფიზიკურად და სიტყვიერად დაუპირისპირდნენ ჟურნალისტს, „საერთაშორისო გამჭვირვალობა-საქართველოს“ რეგიონული ოფისების მენეჯერ ზვიად ქორიძესაც. გიორგი გახარია გამოკითხვაზე უკვე იმყოფებოდა. ასევე ნახეთ გახარია მარტო იყო, თავს დაესხა 10 ადამიანი - ბერდია სიჭინავა ...