ისრაელის სამი მინისტრი გადადგა ჰამასთან (შეერთებული შტატებისა და ევროკავშირის მიერ ტერორისტულ დაჯგუფებად არის აღიარებული) მიღწეული ზავისადმი პროტესტის ნიშნად. ეროვნული უსაფრთხოების მინისტრმა იტამარ ბენ-გვირმა განაცხადა, რომ გადადგა ცეცხლის შეწყვეტის შეთანხმების დადების შემდეგ. შესაბამისი განცხადება გაავრცელა ულტრამემარჯვენე პარტია "ოცმა იეჰუდიტმა", რომლის ლიდერიც ის არის. ბენ-გვირმა ისრაელის პრემიერ-მინისტრი ბენიამინ ნეთანიაჰუ "ყველა იდეოლოგიური წითელი ხაზის გადაკვეთაში" დაადანაშაულა. მინისტრმა ჰამასთან შეთანხმებას "ტერორიზმის სრული გამარჯვება უწოდა". თანამდებობა დატოვეს ასევე ბენ-გვირის პარტიის წევრებმა, მემკვიდრეობის მინისტრმა ამიჰაი ელიაჰუმ და ნეგევის, გალილეისა და ეროვნული მდგრადობის მინისტრმა იჩაკ ვასერლაუფმა. "ოცმა იეჰუდიტმა" მმართველი კოალიციიდან გასვლის შესახებ განაცხადა. პარტიამ თქვა, რომ მზად არის დაბრუნდეს, თუ ისრაელის სამხედრო მოქმედებები ჰამასის წინააღმდეგ განახლდება და სრულ გამარჯვებამდე გაგრძელდება. ღაზის სექტორში 19 იანვარს ამოქმედდა ცეცხლის შეწყვეტის შეთანხმება ისრაელსა და ჰამასს შორის - რითაც, როგორც იმედოვნებენ, დაიწყო ექვსკვირიანი სიმშვიდის პერიოდი. ღაზის სექტორში საომარი მოქმედებების დასრულების შეთანხმების ფარგლებში, ისრაელმა საპატიმროდან პირველ ეტაპზე გაათავისუფლა 90 პალესტინელი პატიმარი. ამას წინ უძღოდა რადიკალური ისლამისტური მოძრაობის, აშშ-ისა და ევროკავშირის მიერ ტერორისტულ ორგანიზაციად გამოცხადებული ჰამასის მიერ სამი მძევლის გათავისუფლება და ისრაელისთვის გადაცემა. ასევე ნახეთ ისრაელმა გაათავისუფლა 90 პალესტინელი პატიმარი ...