პრეზიდენტი ალიევი რუსეთს აკრიტიკებს, ერთი მხრივ, სახელმწიფო უწყებებს შორის კომუნიკაციის არქონისთვის, რის გამოც, მისი თქმით, ავიაკატასტროფა თავიდან ვერ აირიდეს, ასევე - მომხდარი მოვლენების „შენიღბვისთვის“. „ვითხოვთ დამნაშავეთა დასჯას“ აზერბაიჯანული ავიაკომპანია AZAL-ის თვითმფრინავი Embraer-ი 25 დეკემბერს ჩამოვარდა ყაზახეთის ქალაქ აქტაუსთან. თვითმფრინავი ბაქოდან გროზნოში მიფრინავდა, მაგრამ კურსიდან გადაუხვია მას შემდეგ, რაც ის, ძირითადი ვერსიით, რუსეთის საჰაერო თავდაცვის ცეცხლში მოხვდა. თვითმფრინავში 67 ადამიანი იმყოფებოდა, მათ შორის ეკიპაჟის 5 წევრი. დაიღუპა 38 ადამიანი, გადარჩა - 29. თვითმფრინავში მყოფთა უმრავლესობა, 42 ადამიანი, აზერბაიჯანის მოქალაქე იყო, 16 - რუსეთის, 6 - ყაზახეთის, 3 - ყირგიზეთის. 6 იანვარს ილჰამ ალიევმა პრეზიდენტის ადმინისტრაციაში მიიღო დაღუპული მგზავრებისა და ეკიპაჟის წევრების ოჯახის წევრები, მათ სამძიმარი კიდევ ერთხელ გამოუცხადა და განაცხადა: „სრული რწმუნებით შემიძლია ვთქვა, რომ ამ კატასტროფაში აზერბაიჯანის მოქალაქეების დაღუპვაზე პასუხისმგებლობა რუსეთის ფედერაციის წარმომადგენლებს ეკისრებათ. ჩვენ ვითხოვთ სამართლიანობას, ვითხოვთ დამნაშავეთა დასჯას, ვითხოვთ სრულ გამჭვირვალობას და ადამიანურ ქცევას“. „კოორდინაციის არარსებობა“ მან რუსეთის ფედერაციის სხვადასხვა სამსახური კოორდინაციის უქონლობის გამო გააკრიტიკა: „ქალაქ გროზნოსთან რუსეთის საჰაერო სივრცის ჩაკეტვასთან დაკავშირებით დროული ზომები რომ ყოფილიყო მიღებული, დაცული რომ ყოფილიყო [...] ყველა წესი, ასევე სათანადო კოორდინაცია ყოფილიყო რუსეთის ფედერაციის შეიარაღებულ ძალებსა და სამოქალაქო სამსახურებს შორის, ეს ტრაგედია არ მოხდებოდა“. ალიევმა ჯერ კიდევ 29 დეკემბერს განაცხადა, რომ თვითმფრინავი „მიწიდან სროლის შედეგად“ დაზიანდა და იგი „განუზრახველად ჩამოაგდო რუსეთმა“. „ჩვენ არ ვამბობთ, რომ ეს განზრახ გაკეთდა, მაგრამ გაკეთდა“, - განაცხადა მაშინ ალიევმა. აზერბაიჯანის პრეზიდენტმა 6 იანვარს თქვა, რომ რუსეთში მხოლოდ 29 დეკემბერს - აქტაუში თვითმფრინავის ჩამოვარდნიდან ოთხი დღის შემდეგ - გამოცხადდა საჰაერო ზონაში ოპერირების განსაკუთრებული რეჟიმი, - რაც გულისხმობს აეროპორტების შეზღუდულ რეჟიმში მუშაობას. „ჩვეულებრივ, თუკი ნებისმიერი ქვეყნის საჰაერო სივრცეს საფრთხე ემუქრება, ეს საჰაერო სივრცე დაუყოვნებლივ იკეტება… თუკი რუსეთის საჰაერო სივრცეს საფრთხე ემუქრებოდა, თვითმფრინავის კაპიტნისთვის ეს დაუყოვნებლივ უნდა ეცნობებინათ. საჰაერო სივრცე დაუყოვნებლივ უნდა დაეკეტათ და თვითმფრინავი უკან გაებრუნებინათ“, - თქვა ალიევმა. მან გაიხსენა, რომ ავიაკატასტროფამდე 10 დღით ადრე ქალაქ გროზნოს სიახლოვეს მსგავსი რამ მოხდა: „AZAL-ის თვითმფრინავი შუა გზიდან უკან გააბრუნეს. ამჯერად რატომ არ გააფრთხილეს ეკიპაჟი?“ „შენიღბვა“ აზ...