ინფორმაციას თავად პია კაუმა ავრცელებს პლატფორმა X-ზე. „დისკუსიებისა და ბევრი ფიქრის შემდეგ, გადავწყვიტე საქართველოში ვიზიტის გადადება იმ დრომდე, როდესაც ეუთოს საპარლამენტო ასამბლეის ჩართულობა ყველაზე ეფექტური იქნება“, - წერს ის. მისი განცხადებით, ეუთოს საპარლამენტო ასამბლეა მზადაა, „მოუსმინოს ყველა ხმას და შევთავაზოთ დახმარება ეუთო/ოდირის საარჩევნო რეკომენდაციების განხორციელებაში“. три მის ამ გადაწყვეტილებას მიესალმა სალომე ზურაბიშვილი და ვიზიტის გადადებას „ძალიან გონივრული“ უწოდა. „ქართველი ხალხი აფასებს თქვენს მიერ ქართული დემოკრატიის საზრუნავისა და იმედების გათვალისწინებას. ჩვენ გვჭირდება ეუთო, როგორც არასდროს! და ახალი არჩევნები“ - დაწერა სალომე ზურაბიშვილმა X-ზე. три მის მიერ ვიზიტის გადადებას X-ზე მიესალმა ოპოზიციონერი პოლიტიკოსი ზურაბ გირჩი ჯაფარიძე. ასევე, ევროპარლამენტარები, ვიოლა ფონ კრამონი და რასა იეკნევიჩიანე. პია კაუმა 8-10 იანვარს გეგმავდა დელეგაციასთან ერთად საქართველოში ვიზიტს. კრიტიკოსებს მიაჩნდათ, რომ არსებობდა რისკი, რომ „ქართულ ოცნებას“ ეს ვიზიტი „პროპაგანდისტული მიზნებისთვის“ გამოეყენებინა იმ პირობებში, როდესაც მის ლეგიტიმურობასთან დაკავშირებით საერთაშორისო დონეზე არსებობს სერიოზული კითხვის ნიშნები. ეუთოს საპარლამენტო ასამბლეის პრეზიდენტის ვიზიტის დაგეგმვა გააკრიტიკეს ლატვიელმა და ლიეტუველმა ევროპარლამენტარებმა, გერმანიის პარლამენტის საგარეო ურთიერთობათა კომიტეტის თავმჯდომარე მიხაელ როთმა, ამერიკელმა კონგრესმენმა, აშშ-ის „ჰელსინკის კომისიის“ თავმჯდომარე ჯო უილსონმა, ასევე საქართველოს მეხუთე პრეზიდენტმა სალომე ზურაბიშვილმა. ეუთოს საპარლამენტო ასამბლეის პრეზიდენტს ვიზიტის გადადებისკენ მოუწოდა ოთხმა ოპოზიციურმა გაერთიანებამაც, რომლებმაც 2024 წლის 26 ოქტომბრის საპარლამენტო არჩევნებში 5%-იანი ბარიერი გადალახეს, თუმცა არჩევნებს გაყალბებულად მიიჩნევენ, არალეგიტიმურად აცხადებენ მე-11 მოწვევის პარლამენტს, „ქართული ოცნების“ უმრავლესობის მიერ დაკომპლექტებულ მთავრობასა და კოლეგიის მიერ პრეზიდენტად არჩეულ მიხეილ ყაველაშვილს და ახალ არჩევნებს მოითხოვენ. „ქართული ოცნების“ პარლამენტის წევრი ნინო წილოსანი 5 იანვარს X-ზე წერდა: „პრეზიდენტ კაუმას ვიზიტი კარგი შესაძლებლობა იქნება თანამშრომლობის ფორმატების განსახილველად“. ...