რუსეთის გენერალურმა პროკურატურამ ე.წ. "არასასურველი ორგანიზაციების" სიაში შეიტანა აშშ-ის "ჰელსინკის კომისია". ეს ორგანიზაცია შეერთებული შტატების ხელისუფლების მიერაა შექმნილი საერთაშორისო თანამშრომლობისთვის ადამიანის უფლებების, სამხედრო უსაფრთხოებისა და ეკონომიკური ურთიერთგავლენის სფეროებში. "ჰელსინკის კომისიის" მუშაობა რუსეთში აიკრძალება, მასთან თანამშრომლობისთვის რუსეთის მოქალაქეები შეიძლება სისხლისსამართლებრივ დევნას დაექვემდებარონ. რუსეთის გენერალური პროკურატურის გადაწყვეტილებაში ნათქვამია, რომ კომისიის მუშაობა "მიემართება რუსეთში საზოგადოებრივ-პოლიტიკური ვითარების დესტაბილიზაციას, ორგანიზაციის წევრები მასობრივად ავრცელებენ მასალებს, რომლებიც იწვევს ჩვენი ქვეყნის ხელმძღვანელობის საშინაო და საგარეო პოლიტიკის, უფლებადამცველი ორგანოების და სასამართლო სისტემის მუშაობის დისკრედიტაციას". 2023 წლის მაისში "ჰელსინკის კომისიამ" ოფიციალურად მიმართა აშშ-ის პრეზიდენტს, ჯო ბაიდენს, დაეშვა უკრაინისთვის ATACMS-ის ტიპის ბალისტიკური რაკეტების გადაცემა. როცა 2023 წლის სექტემბერში ბაიდენის ადმინისტრაციამ ეს გადაწყვეტილება მიიღო, კომისია ამას მიესალმა. აშშ-ის "ჰელსინკის კომისიის" ოფიციალური სახელია "ევროპაში უსაფრთხოებისა და თანამშრომლობის კომისია". ის 1976 წელს შეიქმნა. მისი მიზანია, მეთვალყურეობა გაუწიოს 1975 წლის ჰელსინკის შეთანხმების განხორციელებას, რაც მოიცავს თანამშრომლობას და სახელმწიფოთა ტერიტორიული მთლიანობის და სუვერენიტეტის დაცვას. "არასასურველი ორგანიზაციების" შესახებ კანონი რუსეთში 2015 წლიდან მოქმედებს. იკრძალება იმ უწყებების მუშაობა, რომლებსაც ხელისუფლება ამ რეესტრში მოახვედრებს. "არასასურველად" მიჩნეული ორგანიზაციის მუშაობაში მონაწილეობისთვის გათვალისწინებულია ჯარიმა, განმეორებითი შემთხვევა კი ოთხ წლამდე პატიმრობას ითვალისწინებს. კანონში ბუნდოვანია ფორმულირება იმის შესახებ, მაინც რა შეიძლება წარმოადგენდეს მონაწილეობას ორგანიზაციის მუშაობაში. ასევე ნახეთ ქართველები ეგზისტენციალურ ბრძოლაში არიან, კონგრესის წევრები ორივე პარტიიდან მათ გვერდით დგანან - "ჰელსინკის კომისია" ...