თბილისში გამართული ქალთა მარშის მონაწილეები ორბელიანების სასახლესთან მივიდნენ, რა დროსაც სალომე ზურაბიშვილი მათ მცირე ხნით შეუერთდა, მხარდაჭერა გამოუცხადა და შემაღლებული ადგილიდან მიმართა. "ქალები არიან ყველაზე მაგარი ამ ქვეყანაში, ძალიან დიდ იმედს წარმოადგენენ ამ ქვეყნის დღევანდელი დღისთვის და მომავლისთვის და თავისუფალი საქართველოსთვის", - თქვა პრეზიდენტმა, რის შემდეგაც იგი კვლავ სასახლეში დაბრუნდა. ქალების მარში 25 დეკემბერს ფილარმონიის შენობის მიმდებარე ტერიტორიიდან დაიწყო. აქციის მონაწილეები რუსთაველის გამზირის გავლით ორბელიანების სასახლესთან მივიდნენ, რის შემდეგაც მარში პარლამენტთან დაასრულეს. три პრეზიდენტი სალომე ზურაბიშვილი ქალთა მარშზე. 25 დეკემბერი, 2024 წელი ქალთა მარში თბილისში. 25 დეკემბერი, 2024 წელი ქალთა მარშს ზუგდიდშიც შეუერთდნენ. ქალები მთავარ ბულვარში შეიკრიბნენ, მოგვიანებით კი მსვლელობა გამართეს. მათ რამდენიმე წუთით გადაკეტეს ქალაქის ცენტრალური გზა და მოქალაქეებს პროტესტში ჩართვისკენ მოუწოდეს. ქალების მარში ზუგდიდში. 25 დეკემბერი, 2025 წელი მარშის მონაწილეები მივიდნენ სამეგრელო-ზემო სვანეთის რეგიონში სახელმწიფო რწმუნებულის ადმინისტრაციასთან, სადაც 28-ე დღეა საპროტესტო აქცია ტარდება. ადგილზე მობილიზებულმა პოლიციამ აქციის მონაწილეებს თავდაპირველად ადმინისტრაციის შესასვლელთან ახლოს, კიბეზე დგომის უფლება არ მისცა. მარშის მონაწილეების მიერ ამ ფაქტის გაპროტესტების შემდეგ კი მათ სასურველ ლოკაციაზე დგომის ნება მისცეს. 28-ე დღეა, დემონსტრანტები დედაქალაქსა და რეგიონებში აპროტესტებენ „ქართულ ოცნებაში“ მიღებულ გადაწყვეტილებას, რომლის მიხედვითაც, საქართველო 2028 წლის ბოლომდე დღის წესრიგში არ დააყენებს ევროკავშირში გასაწევრიანებლად მოლაპარაკების გახსნის საკითხს. 28 ნოემბრის შემდეგ პოლიციამ აქციის 400-ზე მეტი მონაწილე დააკავა, მათ შორის სისხლის სამართლის წესით დააკავა 30-ზე მეტი ადამიანი, რომელთაც რამდენიმეწლიანი პატიმრობა ემუქრებათ. მათ რიცხვში არიან საზოგადოებისთვის ცნობილი სახეებიც. ...