„დღეს, 07:00 საათიდან დაიწყო რუსეთიდან ჰუმანიტარული ელექტროენერგიის მიწოდება“, - განაცხადა ე.წ. ვიცე-პრემიერის მოვალეობის შემსრულებელმა, „ენერგეტიკისა და ტრანსპორტის მინისტრმა“ ჯანსუღ ნანბამ. „ჩერნომორენერგოს“ პრესცენტრში აცხადებენ, რომ რუსეთიდან მიწოდების დაწყების შემდეგ ამოქმედდა ელექტროენერგიის მიწოდების მანამდე არსებული გრაფიკი, რომელიც 1 ნოემბრიდან მოქმედებდა და ითვალისწინებდა ოთხსაათიან შეზღუდვას, ორ-ორი საათით დღისა და ღამის მონაკვეთებში. მიწოდებული ელექტროენერგიის ლიმიტი 327 მლნ კილოვატსაათია. „ჩერნომორნერგოში“ აცხადებენ, რომ ამ მოცულობის ელექტროენერგია გრაფიკის არსებობის პირობებში იანვარ-თებერვლამდე იქნება საკმარისი. ოკუპირებული აფხაზეთისთვის ელექტროენერგიის მიწოდება რუსეთმა ე.წ. პრეზიდენტის მოვალეობის შემსრულებლის, ბადრი გუნბას მიმართვის საფუძველზე დაიწყო. გუმბას თავის კანდიდატურა აქვს დასახელებული დე ფაქტი პრეზიდენტის არჩევნებზე, რომელიც 15 თებერვალსაა დანიშნული. სოციალურ ქსელებში წერენ, რომ ეს მისი კანდიდატურისადმი მოსკოვის მხარდაჭერაზე მეტყველებს. ტელეგრამის არხებზე წერდნენ, რომ მოსკოვის დროით 10:00 საათზე აფხაზეთი უშუქოდ დარჩა, თუმცა ელექტრომომარაგება რამდენიმე წუთში აღდგა. ასევე ნახეთ "თავის თავს დააბრალონ!" - უმწვავესი კრიზისი აფხაზეთში ასევე ნახეთ უმწვავესი ენერგოკრიზისი აფხაზეთში - რუსეთის შურისძიება? ასევე ნახეთ „თუ აფხაზური მხარე 40%-ის ღირებულებას გადაიხდის, სხვა სურათი იქნება“ - დიალოგი ენგურჰესზე ...