"მე მართლა არ მახსენდება ასეთი კრიტიკული ანგარიში, ყოველ შემთხვევაში, იმ პერიოდიდან, რაც მე არჩევნებზე ვმუშაობ, 2008 წლიდან. შესაძლოა, მანამდე იყო. კრიტიკულში ვგულისხმობ იმას, რომ მართლა 2-3 წინადადების გარდა, რომელიც, შეიძლება, პოზიტიურად იყოს აღქმული, დანარჩენი იმეორებს იმ ყველაფერს, რაზეც ჩვენ, ადგილობრივი სადამკვირვებლო ორგანიზაციები ვსაუბრობდით. დასკვნაში არაფერია ნათქვამი იმაზე, რომ ეს არჩევნები "თავისუფალი" ან "სამართლიანი" იყო", - განაცხადა ნინო დოლიძემ "ტვ პირველთან" საუბარში. მისივე თქმით, ეუთო/ოდირის განცხადება, რომ მათი მანდატი არაა არჩევნების აღიარება თუ არაღიარება, საქართველოში არსებული დღევანდელი კონტექსტის მიმართ პასუხია: "მე მართლა არ მახსენდება, ოდირს დაედო დასკვნა და ციტატა წაემძღვარა იმაზე, რომ მათი მანდატი არ არის არჩევნების აღიარება თუ არაღიარება, ოდირის მანდატია, რომ შეაფასოს მისი თანხვედრა საერთაშორისო სტანდარტებთან და შემდეგ ის არის ხალხის შესაფასებელი. ჩემი აზრით, ეს განცხადება პასუხობს იმ კონტექსტს, რომელიც დღეს საქართველოშია. ჩვენ "ქართული ოცნებისგან" ვისმენდით, რომ ისინი ელოდებიან ოდირს, რომელიც იქნება აღიარება. ამისთვის რომ არ ეპასუხათ, სწორედ ამას მიუძღვნა ოდირმა [ციტატა] და დაუტოვა ქართველ ხალხს შესაფასებლად. ნინო დოლიძე, ასევე, დასკვნიდან ეუთო/ოდირის მთავარ მიგნებებსაც გამოყოფს: "ხაზგასმულია, რომ კი, იყო სხვადასხვა პოლიტიკური პარტიები, მაგრამ "ქართული ოცნება" სარგებლობდა მნიშვნელოვანი უპირატესობით; ასევე საუბარია იმ რიტორიკაზე, რომელიც ძალიან მძიმე იყო წინასაარჩევნო პერიოდში; ასევე საუბარია წინასაარჩევნი პერიოდში ადამიანებზე ზეწოლასა და დაშინებაზე, ანუ ხაზგასმულია, რომ წინასაარჩევნო პერიოდში ადამიანების ნების კონტროლისთვის გადადგმული ნაბიჯები ნახეს, რაც პირდაპირ წინააღმდეგობაშია თავისუფალი არჩევნების პრინციპთან". ასევე ნახეთ ეუთო/ოდირის დასკვნის გამოქვეყნებას კობახიძემ ბრიფინგით უპასუხა "პრობლემებმა ძირი გამოუთხარა საზოგადოების ნდობას პროცესის მიმართ" - რა თქვა ეუთო/ოდირმა? ეუთომ და მისი დემოკრატიული ინსტიტუტებისა და ადამიანის უფლებათა ოფისმა (ODIHR) საქართველოს 2024 წლის 26 ოქტომბრის საპარლამენტო არჩევნების შესახებ საბოლოო დასკვნა დღეს, 20 დეკემბერს გამოაქვეყნა. თუკი 2020 წლის არჩევნების შესახებ ეუთო წერდა: „საქართველოს საპარლამენტო არჩევნები იყო კონკურენტული და, საბოლოო ჯამში, ფუნდამენტური უფლებებისადმი პატივისცემით ჩატარებული“, 2024 წლის არჩევნების შესახებ 20 დეკემბერს გამოქვეყნებულ 53-გვერდიან დასკვნაში წერს: „მთლიანობაში, საარჩევნო კომისიებისა და სასამართლოების მიერ კენჭისყრის დღეს და შემდგომ პერიოდში დაწერილი საჩ...