„ქართული ოცნების" ხელისუფლება „უცხოური გავლენის გამჭვირვალობის შესახებ“ კანონს (ე.წ. აგენტების კანონი) მხოლოდ მაშინ შეცვლის, თუ „სამართლებრივ ხარვეზებს" დაუსაბუთებენ. ამის შესახებ მთავრობის ადმინისტრაციაში დღეს, 20 დეკემბერს, გამართულ პრესკონფერენციაზე განაცხადა პრემიერ-მინისტრმა ირაკლი კობახიძემ. დაახლოებით ერთი საათით ადრე ევროსაბჭოს გენერალურმა მდივანმა ალენ ბერსემ თბილისში, პრესკონფერენციაზე განაცხადა, რომ საქართველოს მთავრობისგან მიიღო „უცხოური გავლენის გამჭვირვალობის შესახებ“ კანონის შეცვლის დაპირება და ამ მიზნით შეიქმნება სამუშაო ჯგუფი. ბერსეს ინფორმაციით, პროცესში ჩართული იქნება ვენეციის კომისია. „ჩვენ ღია ვართ დისკუსიისთვის ნებისმიერ ფორმატში და თუ იქნება კონკრეტული ფორმატი შექმნილი, შემოთავაზებული მათ შორის ევროსაბჭოს მხრიდან მსჯელობისთვის, რა თქმა უნდა, აქაც ვართ ღია. შესაბამისად, აქ არის სრული თანხვედრა ჩვენს გზავნილებს შორის", - განაცხადა ირაკლი კობახიძემ, რომელსაც ევროსაბჭოს გენერალური მდივნის დღევანდელი განცხადების შესახებ ჰკითხეს. რაც შეეხება კანონის გადასინჯვას, კობახიძის თქმით: „აქ არის ერთი რამ მთავარი. ჩვენ უნდა დაგვისაბუთონ, სად არღვევს ეს კანონი სამართლებრივ პრინციპებს. სადაც დაგვისაბუთებენ ასეთ რამეს, რომ არის სამართლებრივი ხარვეზები, რა თქმა უნდა, იქ მზად ვართ გადასინჯვისთვისაც". ასევე ნახეთ ევროსაბჭოს გენერალური მდივნის თქმით, მთავრობა დაჰპირდა „აგენტების კანონის“ ცვლილებას რადიო თავისუფლების შეკითხვას, რა შეიცვალა საქართველოში ალენ ბერსეს ჩამოსვლის შემდეგ, მაგალითად, ე.წ. აგენტების კანონთან მიმართებით, ირაკლი კობახიძემ უპასუხა, რომ ძალიან მნიშვნელოვანი რამ შეიცვალა: „ერთი პრინციპული რამ შეიცვალა. ძლივს ვნახეთ ევროპელი ადამიანი, რომელიც მზად არის, რომ არგუმენტებით გვესაუბროს. პირველი კაცია, პირველი ევროპელია, რომელიც გვეუბნება, რომ მზად არის დაგვიჯდეს, არგუმენტებით გვესაუბროს ამ კანონთან დაკავშირებით, რასაც ვითხოვთ ამდენი ხანია. ნუ, მართლა საოცრება მოხდა. პირველი ევროპელია, რომელიც მზად არის დისკუსიისთვის“. როგორც კობახიძემ თქვა, „აქედან გამომდინარე, ამ ღირსეულ კაცს“ დაუდასტურეს „დისკუსიისთვის მზაობა“. ასევე ნახეთ ვენეციის კომისია "მტკიცედ ურჩევს" ხელისუფლებას, გააუქმოს "აგენტების კანონი" არსებული ფორმით „ქართული ოცნების" საპარლამენტო უმრავლესობამ ე.წ. აგენტების კანონი(უცხოური გავლენის გამჭვირვალობის შესახებ) 2024 წლის გაზაფხულზე მიიღო საქართველოში საპროტესტო აქციების და აშშ-ის, ევროკავშირის სახელმწიფოების და საერთაშორისო ორგანიზაციების, მათ შორის ევროსაბჭოს მოწოდებების მიუხედავად, უარი ეთქვა ამ კანონზე. მას ვეტო დაადო პრეზიდენტმა სალომე ზურაბიშვილმ...