„თიბისი“ და „საქართველოს ბანკი“ აცხადებენ, რომ 5 მილიონ ლარს გამოყოფენ პროევროპულ საპროტესტო დემონსტრაციებზე დაზარალებულთა და მცირე და საშუალო ბიზნესის მხარდასაჭერად. ქვეყნის უდიდესი ბანკები 19 დეკემბერს ერთობლივად გავრცელებულ განცხადებაში წერენ: „ქვეყანაში განვითარებული მოვლენებიდან გამომდინარე, თიბისი და საქართველოს ბანკი ერთობლივად 5,000,000 ლარს გამოყოფს, რომელიც მიმართული იქნება დაზარალებული მოქალაქეების, ასევე მცირე და საშუალო ბიზნესების მხარდასაჭერად“. მათი განცხადებით, ფინანსური რესურსი „მიმართული იქნება მცირე და საშუალო ბიზნესების მხარდასაჭერად; ასევე, ფონდებში, რომლებიც აქციების მიმდინარეობისას, დაზარალებულ მოქალაქეებს იურიდიულ, ფინანსურ თუ ჯანმრთელობასთან დაკავშირებულ მხარდაჭერას უწევენ“. პრესრელიზის თანახმად, ბანკების მიერ გამოყოფილი თანხის ერთი ნაწილი - 2,5 მლნ ლარი - გადანაწილდება შემდეგ ფონდებში: #ერთმანეთისთვის; სოლიდარობის ფონდი Prosperity Georgia; თბილისის ადამიანის უფლებათა სახლი. ხოლო თანხის მეორე ნაწილი - ასევე 2,5 მილიონი ლარი - მოხმარდება ერთობლივი ინიციატივების განხორციელებას პარტნიორ ბიზნესებთან კოლაბორაციით. მათ შორის არიან Mymarket.ge, Glovo, tkt.ge და სხვები. კერძოდ, ბანკების თანახმად, ინიციატივები ასეთია: TBC და mymarket.ge იმ მეწარმეებისთვის, რომლებიც არსებული ვითარების გამო გაუქმებულ საშობაო მარკეტებში ვერ ახერხებენ მონაწილეობის მიღებას, Mymarket-ზე ონლაინ მარკეტი მოეწყობა. საშობაო ონლაინ მარკეტზე მეწარმეები Mymarket-ის პლატფორმაზე საკომისიოს გარეშე ჩაერთვებიან. მომხმარებლები კი, რომლებიც Mymarket-ზე შეიძენენ პროდუქციას, "თიბისის" ბარათებზე დამატებით "ქეშბექს" მიიღებენ. TBC და Glovo "თიბისი" და "გლოვო" იმ მეწარმეებისა და კვების ობიექტების მხარდასაჭერად ერთიანდებიან, რომლებმაც ქვეყანაში შექმნილი სიტუაციის გამო დაკარგეს ან შეუმცირდათ შემოსავლის წყარო. ვინც Glovo-დან ამ ობიექტების პროდუქციას შეიძენს, "თიბისის" ბარათებზე დამატებით ფასდაკლებას მიიღებს. TBC და tkt.ge თეატრებმა და კულტურის სფეროს წარმომადგენლებმა, გაუქმებული სპექტაკლებისა და ღონისძიებების მიუხედავად, საქმიანობის გაგრძელება რომ შეძლონ, "თიბისი ბანკის" და tkt.ge-ის საერთო ინიციატივის ფარგლებში, დეკემბრის თვის განმავლობაში დაგეგმილი და გაუქმებული ღონისძიებების ბილეთების საფასური ჩაირიცხება ფონდში თეატრებისა და მათი მსახიობების მხარდასაჭერად. TBC და Swoop.ge Პლატფორმაზე შესაძლებელი იქნება კონკრეტული სასტუმროების ნომრების ვაუჩერის სიმბოლურ ფასად შეძენა. ვაუჩერის ღირებულებასა და ნომრის საბაზრო ღირებულებას შორის სხვაობა "თიბისის" და Swoop.ge-ის ამ საერთო ინიციატივის ფარგლებში ანაზღაურდება. "საქ...