შეერთებული შტატების საელჩო აზერბაიჯანში კვლავ აკრიტიკებს აზერბაიჯანის ხელისუფლების მიერ დამოუკიდებელი ჟურნალისტებისა და სამოქალაქო აქტივისტების მიმართ დევნას. „საერთაშორისო კრიტიკა ხელისუფლების მიმართ, მის მიერ თავისუფალი მედიისა და სამოქალაქო საზოგადოების დევნის გამო ერთადერთი რამის შედეგია: ხელისუფლების მიერ თავისუფალი მედიისა და სამოქალაქო საზოგადოების დევნის“, - წერს საელჩო პლატფორმა X-ზე. აშშ-ის საელჩო 19 დეკემბერს გამოეხმაურა აზერბაიჯანის პროსახელისუფლებო ტელევიზიაში, AZTV-ში გასულ სიუჟეტს სათაურით: „ვაშინგტონის „მშიშრული დიპლომატია“ ბაქოს წინააღმდეგ“. „ფაქტია, რომ 2023 წლის ნოემბრის შემდეგ 30-ზე მეტი ჟურნალისტი და ბლოგერი დააკავეს. „მშიშრულია“, რომ ვიკითხოთ, რატომ? თუ აზერბაიჯანული საზოგადოების ამ ფაქტისგან ყურადღების გადატანის მცდელობაა „მშიშრული“ საქციელი?" - წერს საელჩო. საელჩო იქვე აღნიშნავს, რომ მიმდინარე კვირა მედიის წიგნიერების კვირაა და აზერბაიჯანის საზოგადოებას მიმართავს: „გახსოვდეთ, რომ მოიძიოთ მრავალფეროვანი საინფორმაციო წყაროები, კითხვის ნიშნის ქვეშ დააყენოთ ნარატივები, და ფხიზლად იყავით, შეცდომაში არ შეგიყვანონ“. გასულ კვირაში შეერთებული შტატების სახელმწიფო დეპარტამენტმა აზერბაიჯანის ხელისუფლებას მოუწოდა, დაუყოვნებლივ გაათავისუფლოს ბოლო პერიოდში დაპატიმრებული ჟურნალისტები და ადამიანის უფლებათა დამცველები. „მოვუწოდებთ აზერბაიჯანის მთავრობას, გაათავისუფლოს ადამიანები, რომლებიც დაპატიმრებული არიან ადამიანების უფლებების დაცვისთვის, შეწყვიტოს სამოქალაქო საზოგადოების შევიწროება, პატივი სცეს ადამიანის უფლებებსა და ფუნდამენტურ თავისუფლებებს და შეასრულოს ვალდებულებები, რომლებიც აიღო ევროპის უსაფრთხოების და თანამშრომლობის ორგანიზაციაში გაწევრიანებისას“, - წერია 11 დეკემბერს სახელმწიფო დეპარტამენტის გავრცელებულ განცხადებაში. კრიტიკაზე პასუხად, აზერბაიჯანის საგარეო საქმეთა სამინისტრომ განაცხადა, რომ „კარგადაა ცნობილი, რომ ენტონი ბლინკენის ორმაგმა სტანდარტებმა ჩვენს ქვეყანაში ადამიანის უფლებებთან დაკავშირებით მოახდინა სამხრეთ კავკასიაში შეერთებული შტატების პოლიტიკის პარალიზება“. ადამიანის უფლებადამცველთა და დამკვირვებელთა თქმით, 2024 წლის ბოლოს COP29-ის - გაეროს „ბაქოს კლიმატის კონფერენციის“ - შემდეგ პერიოდში აზერბაიჯანის ხელისუფლებამ კიდევ ერთხელ გაააქტიურა შემორჩენილი დამოუკიდებელი ხმების ჩახშობის კამპანია. პრეზიდენტი ილჰამ ალიევი, რომელმაც ქვეყნის მართვა მამისგან, ჰეიდარ ალიევისგან 2004 წელს გადაიბარა, დასავლეთის კრიტიკას სათვალავში არ იღებს. 18 დეკემბერს რუსეთის სამთავრობო მედიასთან ინტერვიუში ილჰამ ალიევმა განაცხადა: „აზერბაიჯანული მედია არ შეიძლება ფინანსდებოდეს უცხოური წყაროდან არცერთი პროცენტით. არ შეიძლება. რატომ? ჩვენ ხომ არ ვაფინანს...