დღეს, 16 დეკემბერს, ბრიუსელში ევროკავშირის საგარეო საქმეთა მინისტრების მორიგი შეხვედრა იმართება. წინასწარ ცნობილია, რომ საქართველო ერთ-ერთი მთავარი განსახილველი საკითხი იქნება. საბჭოს შეხვედრის დაწყებამდე ჟურნალისტებთან კომენტარი გააკეთა კაია კალასმა, ევროკავშირის წარმომადგენელმა საგარეო და უსაფრთხოების პოლიტიკის საკითხებში. მისი თქმით, საქართველოში განვითარებული მოვლენები არ შეესაბამება "იმ მიმართულებას, საითაც [ევროკავშირის წევრობის] კანდიდატი ქვეყანა უნდა მიდიოდეს". ესტონელი პოლიტიკოსის თანახმად, ევროკავშირის საგარეო საქმეთა მინისტრები იმსჯელებენ, თუ რა შედეგები შეიძლება მოჰყვეს საქართველოს მთავრობის მხრიდან "ოპოზიციის წინააღმდეგ რეპრესიების გამოყენებას". "რისი გაკეთებაც შეგვიძლია ევროპული მხრიდან... ერთი საკითხი იქნება სანქციები, მეორე საკითხია ასევე უვიზო რეჟიმის შეზღუდვა", - თქვა კაია კალასმა. უმაღლეს წარმომადგენელს ჰკითხეს, საგარეო საქმეთა მინისტრები განიხილავენ თუ არა "ქართული ოცნების" ლიდერებისთვის პირადი სანქციების დაწესების საკითხს. "სია უკვე შეთავაზებულია. განვიხილავთ ამ სიას, მაგრამ ამას ყველა უნდა დაეთანხმოს, ჩვენ კი აქამდე არ მივსულვართ. ვნახოთ, თუ აქამდე მივალთ", - თქვა კალასმა. ასევე ნახეთ უვიზო მიმოსვლის შეჩერების მექანიზმის ახალი ანგარიში - რას იტყვის ევროკავშირი | ექსკლუზივი მან ასევე უპასუხა შეკითხვას საქართველოში ახალი პრეზიდენტის არჩევასთან დაკავშირებით. "რაც შეეხება საპრეზიდენტო არჩევნებს, 29 დეკემბრამდე პრეზიდენტი [სალომე ზურაბიშვილი] თანამდებობაზეა, მანამდე კი ძალიან ბევრი შეიძლება მოხდეს", - განაცხადა უმაღლესმა წარმომადგენელმა. ბრიუსელში ევროკავშირის საგარეო საქმეთა მინისტრების შეხვედრა ადგილობრივი დროით 10:00 საათზე დაიწყო და დღის განმავლობაში ცნობილი გახდება, რა გადაწყვეტილებას მიიღებენ ისინი. ასევე ნახეთ ორი პარასკევი 14-დან 29 დეკემბრამდე - რა ხდება ყაველაშვილის ინაუგურაციის შემდეგ? ...