ლიეტუვის ხელისუფლება აცხადებს, რომ „ქართული ოცნების“ პრემიერ-მინისტრ ირაკლი კობახიძესა და კიდევ 16 პირს დაუწესა სანქციები „ესტონეთთან კოორდინაციი“. ლიეტუვის საგარეო საქმეთა ახალი მინისტრი, კესტუტის ბუდრისი პლატფორმა X-ზე წერს: „ესტონეთთან კოორდინაციით, ჩვენ გავაფართოვეთ სანქცირებული ქართველი პოლიტიკოსების სია და დავამატეთ კიდევ 17 პირი, მათ შორის პრემიერ-მინისტრი ირაკლი კობახიძე“. „ჩვენ არ შევეგუებით მშვიდობიანი მომიტინგეების, ჟურნალისტების და ოპოზიციის მიმართ ძალადობას და ჩაგვრას“, - წერს მინისტრი ბუდრისი. იგი ევროკავშირს ერთობლივი ქმედებებისკენ მოუწოდებს. რამდენიმე საათით ადრე ესტონეთის საგარეო საქმეთა მინისტრმაც გამოაცხადა სანქციების სიის გაფართოების შესახებ გადაწყვეტილება და სიაში, ირაკლი კობახიძესთან ერთად, კიდევ 13 თანამდებობის პირი შეიყვანა. ესტონეთის საგარეო საქმეთა სამინისტროს არ გაუსაჯაროვებია დასანქცირებულების სია. ოფიციალურ განცხადებაში დაწერეს: „ძალადობა, რომელსაც საქართველოს ხელისუფლება იყენებს მომიტინგეების, ჟურნალისტების და ოპოზიციის ლიდერების მიმართ, მიუღებელია, დანაშაულია და ადამიანის უფლებების წინააღმდეგაა მიმართული. მოვუწოდებ ევროკავშირის ყველა ქვეყანას, რეაგირება მოახდინონ იმაზე, რაც საქართველოში ხდება და დააწესონ კონკრეტული ზომები მათ წინააღმდეგ, ვინც მიმართავს არასათანადო ძალას და სასტიკ ძალადობას საქართველოს ხალხის მიმართ და ძირს უთხრის დემოკრატიას“. ლიეტუვამ, ესტონეთმა და ლატვიამ 2 დეკემბერს დაუწესეს სავიზო სანქციები 11 მაღალი თანამდებობის პირს - ბიძინა ივანიშვილსა და შინაგან საქმეთა სამინისტროს 10 მაღალჩინოსანს. ასევე ნახეთ ბიძინა ივანიშვილი და შსს-ს 10 მაღალჩინოსანი - ცნობილია იმ პირთა სია, რომლებსაც ბალტიის სახელმწიფოებმა სავიზო სანქცია დაუწესეს ...