„ქვეყნების სიაც გვექნება, რომლებსაც აქვთ უსამართლო დამოკიდებულება ჩვენი ქვეყნის მიმართ“, - განაცხადა ირაკლი კობახიძემ ინტერვიუში აზერბაიჯანულ პროსახელისუფლებო ტელევიზია Real TV-სთან. ინტერვიუ, რომელიც 12 დეკემბერს ჩაიწერა, 13 დეკემბერს გავიდა პირდაპირ ეთერში აზერბაიჯანული გახმოვანებით. ირაკლი კობახიძე ქართულად საუბრობდა და მის ციტატებს კობახიძის ადმინისტრაციის პრესცენტრი ავრცელებს. ირაკლი კობახიძეს ამ სიაში შესაყვანი ქვეყნები არ დაუსახელებია: „დღეს არ მინდა, ეს ქვეყნები დავაკონკრეტო, რათა მათ დავუტოვოთ შანსი, შეიცვალონ საკუთარი ქცევა“, - განაცხადა მან. „რუსული სახელმძღვანელოდანაა“ ანალიტიკოსებს მიაჩნიათ, რომ ეს ინიციატივა ჰგავს რუსეთის ფედერაციაში პრეზიდენტ ვლადიმირ პუტინის ინიციატივით შექმნილ „არამეგობრული ქვეყნების“ სიას. „არამეგობრული ქვეყნების“ სია აქვს ბელარუსსაც, რომელსაც ავტორიტარი ლიდერი ალიაქსანდრ ლუკაშენკა მართავს. „კობახიძის ეს ინიციატივა, როგორც მისი ყველა ბოლო ინიციატივა, არის რუსული სახელმძღვანელოდან გადმოღებული და ამ სახელმძღვანელოს ადაპტაციის მცდელობა ქართულ რეალობაზე“, - ეუბნება რადიო თავისუფლებას გიორგი მელაშვილი, „ევროპულ-ქართული ინსტიტუტის“ დამფუძნებელი. იგი საუბრობს „ქართული ოცნების“ „სიებით ობსესიაზე“: „ბევრი მსგავსება შეიძლება დავინახოთ რუსეთთან, - სხვადასხვანაირი სიით ობსესია, მათ შორის „აგენტების“, „არამეგობრული ქვეყნების“, - რაც ჯდება პროპაგანდისტულ გზავნილებში, თითქოს საქართველოს ნამდვილი მტერი ჰყავს არა რუსეთის სახით, არამედ დასავლეთის სახით“, - ამბობს ის. „ქართულმა ოცნებამ“ 2024 წელს, ხელმეორედ - წინა წელს კანონპროექტის მიღებისა და პროტესტის ფონზე გაწვევის შემდეგ - მიიღო რუსული სტილის „აგენტების კანონი“. ასევე ნახეთ სრული სიმართლე „აგენტების კანონზე“ „გლობალური ომის პარტია“ აზერბაიჯანულ ტელევიზიასთან ინტერვიუში კობახიძემ ასევე ისაუბრა „გარკვეული ძალების“ სურვილზე, „საქართველო გამხდარიყო მეორე ფრონტი რუსეთის წინააღმდეგ“. მან გაიმეორა, რომ „ამ ძალებს აქვთ მნიშვნელოვანი გავლენა როგორც ევროკავშირზე, ასევე ამერიკის მოქმედ ადმინისტრაციაზე“. ეს ფრაზა ნაწილია „ქართული ოცნების“ და მისი დამფუძნებლის, ბიძინა ივანიშვილის შეთქმულების თეორიებისა „გლობალური ომის პარტიის“ შესახებ. ასევე ნახეთ მივაგენით, ვინ არის „გლობალური ომის პარტია“ და რატომ ერჩის ივანიშვილს - შეთქმულების ამ თეორიის სათავეებთან „ასეთი, „არამეგობრული ქვეყნების“ მსგავსი სიის შექმნა კარგად ჯდება რუსული ტიპის კონსპიროლოგიაში, რითაც „ქართული ოცნება“ ცდილობდა ამომრჩეველზე ზეგავლენას. ეს აბსოლუტურად იდენტურია დეზინფორმაციაზე რუსული სახელმძღვანელოსი“, - ამბობს გიორგი მელაშვილი. ვინ არის რუსეთის სიაში? ვლადიმირ პუტინმა ჯერ კიდევ 2018 წელს გადაწ...