13 დეკემბერს რუსეთის ჯარებმა რაკეტებით და დრონებით მასირებული შეტევა მიიტანეს უკრაინაზე, განსაკუთრებით ქვეყნის დასავლეთ რეგიონებზე. უკრაინის ხელისუფლების ინფორმაციით, დღევანდელი თავდასხმის სამიზნე ენერგეტიკის ინფრასტრუქტურა იყო. უკრაინის საჰაერო ძალების ინფორმაციით, რუსეთმა გამოიყენა 94 ბალისტიკური, აერობალისტიკური და ფრთოსანი რაკეტა და 193 უპილოტო საფრენი აპარატი. სარდლობის მონაცემებით, საჰაერო და თავდაცვის ძალების საზენიტო და რადიოელექტრონული ბრძოლის ჯგუფებმა და ავიაციამ, მათ შორის F-16 ტიპის თვითმფრინავებმა, ჩამოაგდეს 81 რუსული რაკეტა და 80 დრონი, კიდევ 105 უპილოტო საფრენი აპარატი ლოკალურად დაიკარგა, 5 რუსეთის ტერიტორიაზე დაბრუნდა, 1 ბელარუსისკენ წავიდა. პრეზიდენტმა ვოლოდიმირ ზელენსკიმ განაცხადა, რომ უკრაინის ენერგეტიკულ ობიექტებზე ერთ-ერთი ყველაზე მასშტაბური შეტევა განხორციელდა. ზელენსკიმ მსოფლიოს ლიდერებს კიდევ ერთხელ მოუწოდა რუსეთის წინააღმდეგ სანქციების გაძლიერებისა და უკრაინისთვის საჰაერო თავდაცვის თანამედროვე სისტემების, კერძოდ, Patriot-ის გადაცემისკენ. რუსეთის თავდაცვის სამინისტრომ განაცხადა, რომ უკრაინის სათბობ-ენერგეტიკული ინფრასტრუქტურის ობიექტებს მაღალი სიზუსტის რაკეტებით და უპილოტო საფრენი აპარატებით დაარტყეს უკრაინის მიერ ქალაქ ტაგანროგის სამხედრო აეროდრომზე შორ მანძილზე მოქმედების ამერიკული რაკეტებით(ATACMS) შეტევის პასუხად და ყველა სამიზნე გაანადგურეს. როსტოვის ოლქის ქალაქ ტაგანროგის სამხედრო აეროდრომზე შეტევა 11 დეკემბერს განხორციელდა. ასევე ნახეთ რუსეთი აცხადებს, რომ ტაგანროგის სამხედრო აეროდრომს უკრაინის არმიამ ATACMS-ის რაკეტებით შეუტია ასევე ნახეთ WSJ: ტრამპს სურს, რომ უკრაინაში ცეცხლის შეწყვეტის რეჟიმი ევროპელმა სამხედროებმა გააკონტროლონ რუსეთმა უკრაინის ენერგოობიექტების განადგურება ქვეყანაში ფართომასშტაბიანი შეჭრიდან მალევე დაიწყო და ამ სისტემას დღემდე მიზანმიმართულად უტევს. უკრაინაში შექმნილი ენერგოკრიზისი განსაკუთრებით ზამთრის პერიოდში მწვავდება. უკრაინის ენერგოობიექტების მიზანმიმართულად განადგურების გამო, 2024 წლის მარტში სისხლის სამართლის საერთაშორისო სასამართლომ გასცა რუსეთის შავი ზღვის ფლოტის სარდლის, ადმირალ ვიქტორ სოკოლოვის და საჰაერო-კოსმოსური ძალების შორეული ავიაციის სარდლის, გენერალ-ლეიტენანტ სერგეი კობილაშის დაპატიმრების ორდერები. ...