დღეს, 13 დეკემბერს, რუსეთის ჯარებმა უკრაინის რეგიონებზე მასირებული შეტევა მიიტანეს რაკეტებით და უპილოტო საფრენი აპარატებით. მორიგი თავდასხმის გამო საჰაერო განგაშმა უკრაინის ტერიტორიის უმეტესი ნაწილი მოიცვა. უკრაინის ენერგეტიკის სამინისტროს ინფორმაციით, მასირებული შეტევის ძირითადი სამიზნე ისევ ენერგოობიექტები იყო. ადგილობრივი დროით 10:00 საათის მონაცემებით, ხარკოვსა და ნიკოპოლში დაზიანებულია სახლებიც. განახლება: 11:00 საათისთვის ხარკოვის საოლქო-სამხედრო ადმინისტრაციამ გაავრცელა ცნობა, რომ დაბა მირნოეში დარტყმა იყო საწარმოზე, სადაც 4 ადამიანი დაიჭრა. ჩერნიგოვის საოლქო-სამხედრო ადმინისტრაციის ინფორმაციით, სამ რაიონში დაზიანებულია სახლები, გიმნაზია და ფერმა. ასევე ნახეთ პენტაგონი ადასტურებს უკრაინაზე რუსული „ორეშნიკით“ მორიგი დარტყმის შესაძლებლობას რუსეთმა უკრაინის ენერგოობიექტების განადგურება ქვეყანაში ფართომასშტაბიანი შეჭრიდან მალევე დაიწყო და ამ სისტემას დღემდე მიზანმიმართულად უტევს. უკრაინაში შექმნილი ენერგოკრიზისი განსაკუთრებით ზამთრის პერიოდში მწვავდება. უკრაინის ენერგოობიექტების მიზანმიმართულად განადგურების გამო, 2024 წლის მარტში სისხლის სამართლის საერთაშორისო სასამართლომ გასცა რუსეთის შავი ზღვის ფლოტის სარდლის, ადმირალ ვიქტორ სოკოლოვის და საჰაერო-კოსმოსური ძალების შორეული ავიაციის სარდლის, გენერალ-ლეიტენანტ სერგეი კობილაშის დაპატიმრების ორდერები. ...