პოეტ ზვიად რატიანს, რომელსაც13 დღის წინათ პროევროპულ საპროტესტო დემონსტრაციაზე დაკავებისას ფიზიკურად გაუსწორდნენ, 12 დეკემბერს თავს დაესხნენ. ამის შესახებ თავდაპირველად მისმა მეგობარმა, კომპოზიტორმა არჩილ გიორგობიანმა განაცხადა „ტვ პირველის“ პირდაპირ ეთერში. ინფორმაცია რადიო თავისუფლებას დაუდასტურეს რატიანის ოჯახის წევრებმა. ზვიად რატიანს საკუთარი საცხოვრებელი სახლის სადარბაზოსთან დაახლოებით საღამოს 9-ის ნახევრისთვის დაესხნენ თავს. ის ამბობს, რომ მოსაყოლი ბევრი არაფერია: „სადარბაზოდან რომ გამოვედი, ფეხი დამიდეს. მე რაც მახსოვს, ოთხნი იყვნენ. წავიბორძიკე, ცოტა გადამირბინეს და გაიქცნენ“, - ამბობს ის „ტვ პირველთან“. რატიანი პოლიციამ 29 ნოემბრის ღამეს დააკავა აქციაზე, რა დროსაც მას სამართალდამცავები ფიზიკურად გაუსწორდნენ. არსებობს კადრები, რომლებშიც ჩანს, როგორ უსწორდება ზვიად რატიანს ათობით სპეცრაზმელი. მას მოტეხილი ჰქონდა მეხუთე მალა, გატეხილი ჰქონდა ცხვირის ძვალი და ძგიდე, თავსა და მთელ სხეულზე კი ჰქონდა სხვადასხვა სიმძიმის ჰემატომები, დაჟეჟილობები. ზვიად რატიანს თბილისის საქალაქო სასამართლომ 8-დღიანი პატიმრობა შეუფარდა. ...