არასამთავრობო ორგანიზაცია „თეთრმა ჩაფხუტებმა“ სამძებრო-სამაშველო ოპერაცია დაასრულა სირიის დედაქალაქ დამასკთან მდებარე საპყრობილეში, რომელიც ასადის რეჟიმის სისასტიკის სიმბოლოდ იქცა. ორგანიზაციის წარმომადგენლები სამხედრო ციხის სავარაუდო საიდუმლო საკნებს ეძებდნენ. ადგილობრივი მეამბოხეების მიერ ასადის რეჟიმის დამხობისა და საპყრობილეზე შტურმის შედეგად ათეულობით ათასი პატიმრის გათავისუფლების შემდეგ იყო ეჭვი, რომ ბევრი პატიმარი, რომელთა ბედი ოჯახებისთვის უცნობია, შესაძლოა, საიდუმლო საკნებში დარჩა. „თეთრი ჩაფხუტების“ საიტზე 9 დეკემბერს, გვიან ღამით გამოქვეყნებული განცხადების თანახმად, სპეციალურმა ჯგუფებმა ციხის დაგეგმარების შესახებ ინფორმირებულ პირებთან ერთად დეტალურად შეამოწმეს მთელი შენობა, მისი სარდაფები, შიდა ეზოები და მიმდებარე ტერიტორია და არანაირი საიდუმლო ნაგებობები არ აღმოუჩენიათ. სამძებრო ოპერაციაში ჩართული ჰყავდათ საგანგებოდ გაწვრთნილი ძაღლებიც. არასამთავრობო ორგანიზაციის ინფორმაციით, ასადის რეჟიმს ამ საპყრობილეში დაახლოებით 150 ათასი ადამიანი ჰყავდა. ციხეს „სასაკლაოს" უწოდებდნენ ბადრაგის სისასტიკისა და პატიმრების წამების გამო. სააგენტო dpa-ს ინფორმაციით, საპატიმროს მიღმა არაერთი მასობრივი სამარხია. ასევე ნახეთ ასადის დამხობა, "სამართლიანობის ზეიმი", რომელსაც რისკიც ახლავს. მათ შორის, საქართველოსთვისაც? სირიაში მოქმედმა შეიარაღებულმა დაჯგუფებებმა სამთავრობო ძალებზე მასშტაბური შეტევა 2024 წლის ნოემბრის ბოლოდან დაიწყეს, რამდენიმე დღეში აიღეს ქვეყნის სიდიდით მეორე ქალაქი ალეპო, კონტროლი დაამყარეს არაერთ სხვა ქალაქზეც და 8 დეკემბრისთვის შევიდნენ დედაქალაქ დამასკში. რუსეთის მიერ მხარდაჭერილმა პრეზიდენტმა ბაშარ ასადმა ოჯახთან ერთად სირია დატოვა და თავი მოსკოვს შეაფარა. ძირითადი ძალა, რომელმაც ასადის რეჟიმი დაამხო, ისლამისტური დაჯგუფება „ჰაიათ თაჰრირ ალ შამია"(HTS). ეს დაჯგუფება მსოფლიოს არაერთი სახელმწიფოს, მათ შორის აშშ-ის, ევროკავშირის ქვეყნების და რუსეთის მიერ ტერორისტულ ორგანიზაციადაა გამოცხადებული. „ჰაიათ თაჰრირ ალ შამმა" ბოლო წლებში კავშირი გაწყვიტა „ალ-ყაიდასთან" და ცდილობდა თავი წარმოეჩინა სირიის მთავრობის პრაგმატულ ალტერნატივად. ასევე ნახეთ ჟურნალისტებმა დაადგინეს სირიაში 2015 წლიდან დაღუპული 543 რუსი სამხედრო მოსამსახურის ვინაობა სირიაში სამოქალაქო ომი მას შემდეგ დაიწყო, რაც 2011 წლის გაზაფხულზე პრეზიდენტ ბაშარ ასადის ხელისუფლებამ სასტიკი მეთოდებით ჩაახშო ძირითადი უფლებებისა და თავისუფლების მოთხოვნით დაწყებული მშვიდობიანი გამოსვლები. ოპოზიციური გაერთიანებების გარდა, შეიარაღებულ კონფლიქტში ჩაერთნენ მსოფლიოს არაერთი სახელმწიფოს მიერ ტერორისტულ ორგანიზაციებად გამოცხადებული „ალ-ყაიდა&q...