8 დეკემბერს თბილისში, ქაშვეთის ეკლესიასთან არსებული პარკინგის ტერიტორიაზე, დააკავეს პროევროპული დემონსტრაციების მონაწილე ლაშა გოგებაშვილი და მისი მეგობარი, რომლის ვინაობასაც ადვოკატი არ ასაჯაროებს. ადვოკატ ვასილ ჟიჟიაშვილის თქმით, მათ ბრალი ოფიციალურად ჯერ წარდგენილი არ აქვთ, თუმცა ვარაუდობს, რომ ისინი დაკავებული არიან საქართველოს ადმინისტრაციულ სამართალდარღვევათა კოდექსის 166-ე და 173-ე მუხლებით. ეს მუხლები გულისხმობს წვრილმან ხულიგნობასა და სამართალდამცველის მოთხოვნისადმი დაუმორჩილებლობას. ადვოკატისვე თქმით, ლაშა გოგებაშვილი მეგობარ გ.წ-სთან ერთად იმყოფებოდა პარლამენტის წინ მდგარ ნაძვის ხესთან. ამის შემდეგ მათ ტერიტორია დატოვეს და ქაშვეთის მიმდებარე პარკინგისკენ გაემართნენ. ისინი მანქანით ტოვებდნენ ტერიტორიას, როდესაც “შკოდის” მარკის ავტომობილებმა ჩაუკეტეს გზა. როგორც ლაშა გოგებაშვილის ბიძაშვილი ხათუნა გოგებაშვილი ჰყვება ტვ "პირველთან" ჩართვაში, ლაშას ნაძვის ხის კონსტრუქციის დაზიანებას ედავებიან, რაც მისი თქმით სიცრუეა. ლაშამ და მისმა მეგობარმა ნაძვის ხის ლითონის კონსტრუქციაზე დროშები დაამაგრეს. ავტომობილებიდან გადმოვიდა დაახლოებით 10-15 სპეცრაზმელი, რომლებიც სასტიკად გაუსწორდნენ ლაშა გოგებაშვილს და გ.წ-ს. ამის შემდეგ ისინი დააკავეს და დიღმის დროებითი მოთავსების იზოლატორში გადაიყვანეს, ეუბნება ადვოკატი რადიო თავისუფლებას. ადვოკატი, რომელმაც დაკავებულები მოინახულა, რადიო თავისუფლებას ეუბნება, რომ მათ აღენიშნებათ დაზიანებები. ასევე ნახეთ აქციის შემდეგ დაკავებულ ექიმ გიორგი ახობაძეს ბრალს დღეს წარუდგენენ მეთერთმეტე დღეა, თბილისსა და სხვა ქალაქებში დემონსტრაციები იმართება პრემიერ-მინისტრის 28 ნოემბრის განცხადების გამო. აქციის მონაწილეები მოითხოვენ ხელახალი საპარლამენტო არჩევნების ჩატარებას და საპროტესტო აქციებზე დაკავებული ადამიანების გათავისუფლებას. დემონსტრანტები მათ "პოლიტპატიმრებად" მოიხსენიებენ. „ქართულ ოცნებაში“ გადაწყვიტეს, რომ 2028 წლის ბოლომდე დღის წესრიგში არ დააყენონ ევროკავშირთან საქართველოს წევრობაზე მოლაპარაკების გახსნის საკითხი და 2028 წლის ბოლომდე უარს ამბობენ ევროკავშირის საბიუჯეტო გრანტებზე. 28 ნოემბრის შემდეგ პოლიციამ აქციის 372 მონაწილე ადმინისტრაციული წესით დააკავა - მათგან 62-ს სასამართლომ ადმინისტრაციული პატიმრობა შეუფარდა, 100-ზე მეტი კი დააჯარიმა. სხვა საქმეებზე განხილვები გრძელდება. გარდა ამისა, პოლიციამ სისხლის სამართლის წესით დააკავა 30-ზე მეტი ადამიანი. მათ რამდენიმეწლიანი პატიმრობა ემუქრებათ. დაკავებულთა შორის არ არიან პოლიციელები, მათ შორის ისინიც, ვინც ჟურნალისტებზე პირდაპირ ეთერში მუშაობის დროს იძალადეს. ...