რუმინეთის პრეზიდენტობის პრორუსმა კანდიდატმა კელინ ჯორჯესკუმ და მისმა მომხრეებმა 8 დეკემბერს საპროტესტო აქცია გამართეს ბუქარესტში. ისინი მოითხოვენ, გადაიხედოს ქვეყნის საკონსტიტუციო სასამართლოს გადაწყვეტილება, რომლის მიხედვითაც, 6 დეკემბერს გაუქმდა საპრეზიდენტო არჩევნების პირველი ტურის შედეგები. როგორც რადიო თავისუფლების რუმინული სამსახური იტყობინება,100-ზე მეტი ადამიანი, ჯორჯესკუს მეთაურობით, ბუქარესტის ცენტრში, დახურული საარჩევნო ოლქის შენობის წინ შეიკრიბა შეძახილებით: "ძირს დიქტატურა!" და " ხმის მიცემა გვსურს!" სასამართლოს პირველი ტურის შედეგები რომ არ გაეუქმებინა, საპრეზიდენტო არჩევნების მეორე ტური 8 დეკემბერს გაიმართებოდა. ჯორჯესკუმ განაცხადა, რომ საპროტესტო აქციაზე მივიდა "დემოკრატიის სახელით" და რომ სასამართლომ "გააუქმა რუმინელი ხალხის ფუნდამენტური ღირებულებები". მან საპროტესტო აქციას "დუმილის წუთი" უწოდა და ასევე თქვა, რომ (გამომსვლელებს) არ მოუწოდებს არანაირი მოქმედებისკენ. ამასთან, დახურულ საარჩევნო უბნებთან საპროტესტო აქციაზე შეკრებისკენ მოწოდება მან წინა დღეს გამოაქვეყნა სოციალურ ქსელებში. საპრეზიდენტო არჩევნების პირველი ტური რუმინეთში 24 ნოემბერს გაიმართა. პოლიტოლოგების პროგნოზების მიუხედავად, ყველაზე მეტი ხმა (22,9%) მოიპოვა მემარჯვენე პოლიტიკოსმა კელინ ჯორჯესკუმ. მეორე ტურში მისი კონკურენტი - ამომრჩეველთა ხმების 19,17 %-ით - ელენა ლასკონი უნდა ყოფილიყო. 6 დეკემბერს საკონსტიტუციო სასამართლომ პირველი ტურის შედეგები მას შემდეგ გააუქმა, რაც სპეცსამსახურებმა გამოაქვეყნეს დოკუმენტები, რომლებშიც ნათქვამი იყო, რომ კანდიდატის სასარგებლოდ აგიტაციას, სავარაუდოდ, 25 ათასი ბოტი-ანგარიში ეწეოდა ტიკტოკში. სპეცსამსახურები აგიტაციას მოსკოვს უკავშირებენ. ჯორჯესკუ რუსეთთან კავშირს უარყოფს და არჩევნების შედეგების გადახედვას მასზე პოლიტიკურ ზეწოლად მიიჩნევს. 62 წლის სასოფლო-სამეურნეო ინჟინერი კელინ ჯორჯესკუ ადრე შედიოდა ულტრამემარჯვენე "რუმინელების გაერთიანების ალიანსში", რომლის მიზანია რუმინეთისა და მოლდოვის გაერთიანება. საპრეზიდენტო არჩევნებში ის მონაწილეობდა, როგორც დამოუკიდებელი კანდიდატი. წინასაარჩევნო კამპანიისას, ჯორჯესკუ აკრიტიკებდა ნატოს და უკრაინისთვის სამხედრო დახმარებას და ამომრჩევლებს რუსეთთან დაახლოებისკენ მოუწოდებდა. ასევე ნახეთ რუმინეთში საიდუმლოების გრიფი მოხსნეს დოკუმენტებს საპრეზიდენტო კანდიდატ ჯორჯესკუს შესახებ ...