სირიის პრეზიდენტი ბაშარ ასადი და მისი ოჯახი მოსკოვში ჩავიდნენ, იტყობინება რუსული სახელმწიფო მედია. სირიელმა მეამბოხეებმა ამ ქვეყნის დედაქალაქი აიღეს - ბოლო მოეღო ასადის ოჯახის სასტიკ, ნახევარსაუკუნოვან მმართველობას. რუსეთის საგარეო საქმეთა სამინისტრომ 8 დეკემბერს განაცხადა, რომ ასადმა გადადგომის შესახებ გადაწყვეტილება შეიარაღებული კონფლიქტის რიგ მონაწილეებთან „მოლაპარაკების“ შემდეგ მიიღო და პოსტი დატოვა, გასცა რა მითითებები ხელისუფლების მშვიდობიანი გადაცემისთვის“. რუსეთი აცხადებს, რომ მას არ მიუღია მონაწილეობა ასადის მიერ ქვეყნის დატოვების საკითხში. რუსეთი სირიის დიდი ხნის მოკავშირეა. იგი მნიშვნელოვან სამხედრო და პოლიტიკურ მხარდაჭერას უწევდა ასადის რეჟიმს, განსაკუთრებით სირიის სამოქალაქო ომის დროს, რომელიც 2011 წელს დაიწყო. რუსეთის საგარეო საქმეთა სამინისტროს განცხადება გავრცელდა მას შემდეგ, რაც მეამბოხეებმა სახელმწიფო ტელევიზიის ეთერით ამცნეს ხალხს, რომ დამასკი "ახლა თავისუფალია ასადისგან", რომლის ოჯახი 1971 წლიდან რკინის მუშტით მართავს ქვეყანას. სირიის პრემიერ-მინისტრმა მოჰამედ ღაზი ალ-ჯალალიმ ვიდეომიმართვაში განაცხადა, რომ მთავრობა „მზადაა, ითანამშრომლოს ხალხის მიერ არჩეულ ნებისმიერ ხელმძღვანელობასთან“. „ჩვენ გვჯერა, რომ სირია ყველა სირიელისაა და ეს არის მისი ყველა შვილის ქვეყანა, და რომ ეს ქვეყანა შეიძლება იყოს ნორმალური სახელმწიფო, რომელსაც კარგი ურთიერთობა ექნება თავის მეზობლებთან და მსოფლიოსთან, რეგიონულ ალიანსებსა და ბლოკებში წევრობის გარეშე“, - თქვა ჯალალიმ. 8 დეკემბერს ის სახლიდან შეიარაღებული ადამიანების თანხლებით მიმავალი ნახეს. არსებული ცნობით, ის შეხვდა “ჰაიათ თაჰრირ ალ შამის”, (HTS), სუნიტთა მეამბოხე ჯგუფის, ხელმძღვანელობას, რომელიც ასადის რეჟიმის წინააღმდეგ ამბოხებას მეთაურობდა. “ჰაიათ თაჰრირ ალ შამი” აშშ-სა და ევროკავშირში ტერორისტულ ორგანიზაციადაა გამოცხადებული. ბოლო წლებში ისლამისტურმა დაჯგუფებამ გაწყვიტა კავშირი "ალ-ყაიდასთან" და ცდილობდა სირიის მთავრობის პრაგმატულ ალტერნატივად წარმოედგინა თავი. მაგრამ რჩება შეშფოთება მის მიერ ადამიანის უფლებების დარღვევისა და ტერორისტულ ჯგუფებთან კავშირებთან დაკავშირებით. თეთრი სახლის პრესსამსახურმა რადიო თავისუფლებას განუცხადა, რომ აშშ-ის პრეზიდენტი ჯო ბაიდენი და მისი გუნდი „ყურადღებით აკვირდებიან სირიის განსაკუთრებულ მოვლენებს და მუდმივ კავშირში არიან რეგიონულ პარტნიორებთან“. ექსპერტები თვლიან, რომ ასადის რეჟიმის დაცემა არის კრემლის დიდი გეოპოლიტიკური მარცხი. მოსკოვი, თეირანთან ერთად, წლების განმავლობაში უჭერდა მხარს სირიის მთავრობას სამოქალაქო ომის დროს. რუსეთს სირიაში აქვს სამხედრო ობიექტები, მათ შორის საჰაერო ბაზა ჰმეიმიმში და სტრატეგიული საზღვაო ობიექტი ტარტუსში, რომლებიც ასე...