სახალხო დამცველის შეფასებით, ყოვლად დაუშვებელია საგამოძიებო მოქმედებების წარმართვისას არასრულწლოვანისთვის დამაზიანებელი მოქმედებების განხორციელება. ამით ომბუდსმენის აპარატი გამოეხმაურა დოდი ხარხელის ბინის ჩხრეკის ფაქტს - ბინაში იმყოფებოდა მისი არასრულწლოვანი შვილიც. სახალხო დამცველის განცხადებით, აპარატი შეისწავლის ამ ფაქტს და უფლებამოსილების ფარგლებში მოახდენს ყველა შესაბამის რეაგირებას. ომბუდსმენი აღნიშნავს, რომ სამართალდამცავი უწყება ვალდებულია, წინასწარ შეაფასოს ვითარება და ყველაფერი გააკეთოს იმისათვის, რომ არასრულწლოვანს შეუქმნას უსაფრთხო გარემო, წინასწარ გათვალისწინების შეუძლებლობის შემთხვევაში კი, არასრულწლოვანი დროულად განარიდოს მიმდინარე პროცესებს მისი ოჯახის წევრის, ახლობლის ან სანდო პირის ჩართულობით. სახალხო დამცველის თანახმად, თუკი ეს შეუძლებელია, სამართალდამცავმა უწყებამ პროცესში სოციალური მუშაკის და ფსიქოლოგის ჩართვა უნდა უზრუნველყოს. "არსებული ცნობით, არასრულწლოვანი სახლში იყო ჩაკეტილი და ბიძას არ ეძლეოდა მასთან შეხვედრის შესაძლებლობა. სახალხო დამცველის აპარატს კომუნიკაცია ჰქონდა შინაგან საქმეთა სამინისტროსთან, ადგილზე გავიდნენ აპარატის წარმომადგენლებიც. შინაგან საქმეთა სამინისტროს, ასევე არასრულწლოვანის ოჯახის წევრის მიერ მოწოდებული ინფორმაციის თანახმად, ბავშვი გამოყვანილია ბინიდან და განრიდებულია მიმდინარე პროცესებს", - წერია სახალხო დამცველის აპარატის მიერ გავრცელებულ ინფორმაციაში. 3 დეკემბერს აქტივისტის, ციფრული მარკეტინგის სპეციალისტის, დოდი ხარხელის ბინაში კრიმინალურმა პოლიციამ ჩხრეკა ჩაატარა. ჩხრეკის პროცესში სახლთან მისი ნათესავები და მეგობრები შეიკრიბნენ. მათი თქმით, დოდი ხარხელი პოლიციამ საბავშვო ბაღთან გააჩერა, პოლიციის ავტომობილში ჩასვა და სახლი წაიყვანა მას შემდეგ, რაც მცირეწლოვანი შვილი ბაღში დატოვა. ამ დროს დოდი ხარხელის საცხოვრებელ ბინაში მისი მეორე არასრულწლოვანი შვილი იყო. ჩხრეკის პროცესში არასრულწლოვანთან შეშვებას ითხოვდა ბავშვის ბიძა, თუმცა პოლიცია მას ამის საშუალებას არ აძლევდა. მას შემდეგ, რაც პოლიციამ ჩხრეკა დაასრულა, დოდი ხარხელმა ჟურნალისტებთან კომენტარში განაცხადა, რომ მისი სახლის ჩხრეკა თვეების წინ დაწყებულ გამოძიებაზე, უკავშირდება საქართველოში მიმდინარე საპროტესტო აქციებს და მის აქტიურობას ონლაინ სივრცეში ამ საკითხზე. მისივე თქმით, ჩხრეკა ჩატარდა მისი ყოფილი ქმრის, სამხედრო ბლოგერ უჩა აბაშიძის საქმეზე. აბაშიძეს პროკურატურა პირადი ცხოვრების საიდუმლოს უკანონოდ მოპოვება-შენახვას ედავება. ხარხელი იხსენებს, რომ პოლიციამ იგი დილით, ბავშვის ბაღში დატოვების შემდეგ გააჩერა და, სავარაუდოდ, სახლის ჩხრეკის ოქმზე ხელის მოწერა მოსთხოვა. "ბავშვი, 3 წლის ლილი, დავტოვე ბაღში და გამოსვლისთანავე დამადგა რამდენიმე მამ...