რუსეთის ჯარებმა უპილოტო საფრენი აპარატებით მორიგი შეტევა მიიტანეს უკრაინის რეგიონებსა და დედაქალაქ კიევზე. ადგილობრივი ხელისუფლების ინფორმაციით, საჰაერო თავდაცვის სისტემამ კიევში ათამდე დრონი მოიგერია. უპილოტო საფრენი აპარატების ნამსხვრევებმა დააზიანა მრავალბინიანი საცხოვრებელი კორპუსი. კიევის მერის, ვიტალი კლიჩკოს ცნობით, არავინ დაშავებულა. უკრაინის თითქმის მთელ ტერიტორიაზე საჰაერო განგაში 1 დეკემბერს, შუაღამის შემდეგ გამოცხადდა. განახლება: უკრაინის საჰაერო ძალების სარდლობის მიერ ადგილობრივი დროით 12 საათისთვის გამოქვეყნებული მონაცემებით, ღამის განმავლობაში რუსეთის საოკუპაციო ძალებმა გამოიყენეს 78 დრონი, რომელთაგან 32 ჩამოაგდეს, ხოლო 45 ლოკალურად დაიკარგა, სავარაუდოდ, უკრაინის რადიოელექტრონული ბრძოლის საშუალებებით ზემოქმედების შედეგად. საჰაერო თავდაცვის სისტემა ამოქმედებული იყო კიევის, ჩერკასის, ჩერნიგოვის, ჟიტომირის, სუმის და პოლტავის ოლქებში. ასევე ნახეთ ტრამპმა ორბანს აზრი ჰკითხა უკრაინაში მიმდინარე ომის შეწყვეტის თაობაზე 29 უკრაინული დრონის მოგერიებას იუწყება რუსეთის თავდაცვის სამინისტრო. მის მიერ დილით გამოქვეყნებული მონაცემებით, ღამის განმავლობაში 20 უპილოტო საფრენი აპარატი გაანადგურეს ბრიანსკის ოლქში, 7 - კალუგაში, 1 - სმოლენსკის ოლქში და 1 - კურსკში. ბრიანსკის ოლქის გუბერნატორ ალექსანდრ ბოგომაზის ინფორმაციით, დრონებით შეტევის შედეგად სტაროდუბსკის რაიონში ბავშვი დაიღუპა. დაზიანებულია მრავალბინიანი საცხოვრებელი კორპუსი. საომარი მოქმედებების პირობებში მხარეთა მიერ გავრცელებული ცნობების დამოუკიდებელი წყარებით გადამოწმება გართულებულია. ...