30 ნოემბერს მთავრობის კანცელარიაში გამართულ პრესკონფერენციაზე პრემიერ-მინისტრი ირაკლი კობახიძე გამოეხმაურა 29-30 ნოემბრის ღამის დემონსტრაციას, რომელიც პოლიციამ დაარბია. ირაკლი კობახიძემ პოლიციის მხრიდან ძალის გადამეტება "ცალკეულ" და "სამწუხარო" ინციდენტებად შეაფასა, დემონსტრაციის მონაწილეები კი "ბრუტალურ ძალადობაში" დაადანაშაულა. "ერთ მხარეს იყო ძალადობა, მეორე მხარეს იყო ინციდენტები", - თქვა პრემიერ-მინისტრმა. три პრესკონფერენციის განმავლობაში მან არაერთხელ გაიმეორა, რომ გუშინდელი დემონსტრაცია "არ იყო მშვიდობიანი". "ჩვენთვის ორივე მიმართულებით არის მიუღებელი ძალადობა, შესაბამისად, გამოძიებაც უნდა იყოს წარმართული ორივე მიმართულებით", - თქვა ირაკლი კობახიძემ. კითხვაზე, თუ კონკრეტულად რომელ ფაქტებს უწოდებს პოლიციის მხრიდან "ინციდენტს", ირაკლი კობახიძემ გამოყო შემთხვევა, როცა პოლიციელი წაქცეულ აქციის მონაწილეს წიხლს ურტყამს. ამ ფაქტის ამსახველი ვიდეომასალა სოციალურ ქსელებში ვრცელდება. "არ შეიძლება ამან არ აღგაშფოთოს", - თქვა კობახიძემ ამ შემთხვევაზე საუბრისას და დასძინა, რომ პოლიციელმა "გადააჭარბა საკუთარ უფლებამოსილებას". მან ასევე მადლობა გადაუხადა შინაგან საქმეთა მინისტრსა და "თითოეულ პოლიციელს", რომლებიც, მისი თქმით, "საქართველოს კონსტიტუციურ წყობილებაზე თავდასხმას იგერიებდნენ". "რამდენიმე თვე იქნება რთული" ირაკლი კობახიძემ კიდევ ერთხელ გაიმეორა, რომ რამდენიმე თვეში საქართველოს მთავრობა დასავლეთთან ურთიერთობების "გადატვირთვას" ელის. "მომდევნო რამდენიმე თვე იქნება შესაძლოა უფრო რთულიც, ვიდრე იყო ბოლო სამი წელიწადი", - თქვა საქართველოს პრემიერმა. კობახიძის თანახმად, "ვიღაც-ვიღაცები ჩქარობენ", სანამ აშშ-ში დონალდ ტრამპის ინაუგურაცია შედგება და უკრაინაში ომი დასრულდება. კობახიძის თანახმად, უკრაინაში მიმდინარე ომის დამთავრებას "რამდენიმე თვე დასჭირდება". "მას შემდეგ, რაც დასრულდება ომი უკრაინაში, არსებობს ყველა წინაპირობა ურთიერთობების თვისობრივი გადატვირთვისთვის. ჩვენ ველოდებით ამ მომენტს", - ამბობს პრემიერ-მინისტრი. უკრაინის ომზე საუბრამდე, კობახიძემ ბოლო ორი დღის აქცია "ნაცმაიდანის" მცდელობად შეაფასა. მან თავად გაავლო პარალელი იანუკოვიჩის უკრაინასა და დღევანდელ საქართველოს შორის და თქვა, რომ "2013 წლის უკრაინისგან განსხვავებით, საქართველო არის დამოუკიდებელი სახელმწიფო, ძლიერი ინსტიტუტებით და, რაც მთავარია, გამოცდილი და ბრძენი ხალხით, რომლის სიმტკიცესაც ვერავინ შეარყევს". გარდა ამისა, ირაკლი კობახიძემ ბოლო დღეების პროტესტის ორგანიზებაში ბრალი დასდო "შესაბამის ევრო...