ეროვნული ბანკის ოქტომბრის ანგარიშის მიხედვით, საბანკო სექტორში განთავსებული 57,53 მილიარდი ლარის მოცულობის დეპოზიტების 50,7% (29,17 მილიარდი ლარი) უცხოურ ვალუტაზე მოდის, დანარჩენი 49,3% (28,36 მილიარდი ლარი) კი - ეროვნულ ვალუტაზე. სტატისტიკური მონაცემების თანახმად, ოქტომბერში მოქალაქეებმა და კომპანიებმა ლარში დეპოზიტები დაახლოებით 1,2 მილიარდი ლარით შეამცირეს. ამავე პერიოდში თითქმის 1,1 მილიარდი ლარით გაიზარდა უცხოურ ვალუტაში მათი დეპოზიტების მოცულობა. ოქტომბერში მოქალაქეების დეპოზიტების მოცულობა ლარში თითქმის 394 მილიონი ლარით შემცირდა. წელს მოქალაქეების დეპოზიტების მოცულობა ლარში შემცირდა სექტემბერშიც, თუმცა ოქტომბერთან შედარებით ბევრად უფრო მცირე თანხით - 70,7 მილიონი ლარით; კომპანიების დეპოზიტების მოცულობა ლარში 809 მილიონი ლარით არის შემცირებული. იურიდიული პირების შემთხვევაში, მიმდინარე წლის განმავლობაში დეპოზიტების მხრივ კლებას ადგილი ჰქონდა თებერვალსა (563 მილიონი ლარის ეკვივალენტი) და მაისშიც (517 მლნ ლარის ეკვივალენტი). რადიო თავისუფლებამ ეროვნულ ბანკს ჰკითხა, რით ხსნის იგი მოქალაქეებისა და კომპანიების მხრიდან დეპოზიტების შემცირებას ლარში და ზრდას უცხოურ ვალუტაში. პასუხის მიღების შემთხვევაში, ტექსტი განახლდება. საქართველოს ეროვნულმა ბანკმა ოქტომბერში ლარის კურსის შესანარჩუნებლად 591,1 მლნ დოლარი გაყიდა. ამ თანხის დიდი ნაწილი, 377,7 მლნ დოლარი - აუქციონის გარეშე, ანუ ისე, რომ გაყიდვაზე ინფორმაცია არ გაუვრცელებია. ასევე ნახეთ ოქტომბერში ლარის კურსის შესანარჩუნებლად ეროვნულმა ბანკმა $591 მლნ გაყიდა გასულ თვეში დოლარის გაყიდვას ეროვნული ბანკი „არაფუნდამენტური ფაქტორების ჭარბი გავლენისა და სავალუტო ბაზარზე წინასაარჩევნო პერიოდისთვის ტრადიციულად დამახასიათებელი აჟიოტაჟის პრევენციის მიზნით“ ხსნიდა. 2024 წლის 1 იანვრიდან 31 ოქტომბრის ჩათვლით, ეროვნულმა ბანკმა სავალუტო რეზერვები 587,9 მილიონი დოლარით შეამცირა. ...