5 ნოემბრის არჩევნების შედეგების მიხედვით, წარმოშობით უკრაინელი იუჯინ ვინდმანი აშშ-ის კონგრესის წარმომადგენელთა პალატაში აირჩიეს. ის არის ძმა თეთრი სახლის ყოფილი თანამშრომლის, ალექსანდრ ვინდმანისა, რომელიც 2019-2020 წლებში პრეზიდენტ დონალდ ტრამპის იმპიჩმენტის საქმის ერთ-ერთი მთავარი მოქმედი პირი იყო. ვინდმანმა, როგორც დემოკრატიული პარტიის კანდიდატმა, ვირჯინიის შტატის მე-7 ოლქში იყარა კენჭი. არჩევნების შედეგებით, მან დაახლოებით 5 ათასი ხმით გაუსწრო თავის მეტოქეს რესპუბლიკური პარტიიდან. 49 წლის ვინდმანმა, როგორც AP-ი აღნიშნავს, თავისი წინასაარჩევნო კამპანიისას წამოჭრა აბორტის უფლებისა და დემოკრატიისთვის მოსალოდნელი საფრთხეების თემები იმ შემთხვევაში, თუ დონალდ ტრამპი გაიმარჯვებდა არჩევნებში. მან აშშ-ის არმიაში იმსახურა და თავისი ძმის მსგავსად, მუშაობდა თეთრი სახლის აპარატში. "ეს არის ამერიკული გამოცდილების ძალის დასტური: იმიგრანტი, რომელიც საბჭოთა რეჟიმს გამოექცა და ამ დიად ქვეყანაში ჩამოვიდა ჯიბეში 800 დოლარზე ნაკლებით, ახლა იქნება აქ, როგორც წარმომადგენელთა პალატის არჩეული კონგრესმენი", - განაცხადა მან. ტყუპი ძმები ვინდმანები კიევში, ებრაულ ოჯახში 1975 წელს დაიბადნენ მაშინდელ უკრაინის საბჭოთა სოციალისტურ რესპუბლიკაში და ოთხი წლის ასაკში მამასთან ერთად აშშ-ში გადავიდნენ. კონგრესში რესპუბლიკური პარტიიდან ხელახლა აირჩიეს უკრაინის კიდევ ერთი მკვიდრი, ვიქტორია სპრატცი. ის ცნობილია უკრაინის მოქმედი ხელმძღვანელობის მიმართ კრიტიკით. ასევე ნახეთ რას ნიშნავს ტრამპის გამარჯვება უკრაინისა და მისი ფრონტისთვის? აშშ-ის საპრეზიდენტო არჩევნებში, რომელიც 2024 წლის 5 ნოემბერს გაიმართა, დონალდ ტრამპმა გაიმარჯვა. რესპუბლიკელებმა დაიბრუნეს კონტროლი სენატზე - 100 ადგილიდან მათ არანაკლებ 52 ექნებათ; სამ შტატში ხმების დათვლა კვლავ გრძელდება. ასევე ნახეთ ამერიკელი დემოკრატები სენატში უმრავლესობას კარგავენ კვლავ არ არის ცნობილი, ვინ გააკონტროლებს ახალი მოწვევის წარმომადგენელთა პალატას. Associated Press-ის მონაცემებით, რესპუბლიკელი კანდიდატები იგებენ 206 ოლქში, ხოლო დემოკრატები - 191-ში. გამარჯვებული გამოსავლენია კიდევ 38 ოლქში. უმრავლესობისთვის საჭიროა 218 მანდატი. იმ ოლქებიდან, სადაც ჯერ არ დამთავრებულა ხმების დათვლა, 18-ში რესპუბლიკელები არიან წინ, თუმცა ხმებში სხვაობა მცირეა და ვითარება კიდევ შეიძლება შეიცვალოს. შედეგები რამდენიმე დღეში გახდება ცნობილი. ...