თელავის რაიონული სასამართლოს მოსამართლემ, თამარ კაპანაძემ, პროკურორის დავით გველესიანის შუამდგომლობა დააკმაყოფილა და სამი ადამიანის მკვლელობაში ბრალდებულ ზვიად ზურაბაშვილს აღკვეთის ღონისძიების სახით პატიმრობა შეუფარდა. პროცესზე ისაუბრა ბრალდებულმა და დანაშაული აღიარა. ბრალდებულის სახაზინო წესით დანიშნულ ადვოკატს გიორგი ფარადაშვილს პროცესზე შუამდგომლობა არ დაუყენებია და მხოლოდ ის თქვა, რომ მისი დაცვის ქვეშ მყოფი პოლიციას თავად ჩაბარდა. გამოძიების ინფორმაციით, 28 აგვისტოს ბრალდებულმა გურჯაანის მუნიციპალიტეტის სოფელ ახაშენში ცოლი და ორი პირი ცეცხლსასროლი იარაღიდან გასროლით მოკლა. პროკურატურის განცხადებით, ზურაბაშვილს ბრალდება, საქართველოს სისხლის სამართლის კოდექსის 11 პრიმა 109-ე მუხლის „თ“, „კ“, „ლ“ და „პ“ ქვეპუნქტებით (განზრახ მკვლელობა დამამძიმებელ გარემოებებში - გენდერის ნიშნით, ოჯახის წევრის, სამი პირის მიმართ და არაერთგზის) აქვს წარდგენილი, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს. საქმეზე წინასასამართლო სხდომა თელავის რაიონულ სასამართლოში 22 ოქტომბერს, 13:00 საათზე გაიმართება. ...