უკრაინის დონეცკის ოლქში რუსეთის არმიის იერიშის შედეგად სამი ადამიანი დაიღუპა და ცხრა დაიჭრა, განაცხადა 19 აგვისტოს რეგიონული სამხედრო ადმინისტრაციის ხელმძღვანელმა ვადიმ ფილაშკინმა. ამავე დროს რუსეთმა 11 უპილოტო საფრენი აპარატი „შაჰედი“ გაუშვა დონეცკსა და რამდენიმე სხვა რეგიონში, მათ შორის კიევისკენ, მაგრამ უკრაინის სამხედრო-საჰაერო ძალებმა განაცხადეს, რომ ყველა დრონი ჩამოგდებულია. შეტევა მოხდა მაშინ, როცა უკრაინა ცდილობს გაამყაროს თავისი პოზიციები რუსეთის კურსკის ოლქში მას მერე, რაც თითქმის ორი კვირის წინ მოულოდნელად დაიწყო კონტრიერიში რუსეთის ტერიტორიაზე. ამასობაში რუსეთის ხელისუფლებამ გაამკაცრა შემოწმებები მიგრანტებს შორის, რომლებმაც რუსეთის მოქალაქეობა მიიღეს. ეს მოხდა მას შემდეგ, რაც სახელმწიფო დუმამ 31 ივლისს მიიღო კანონი, რომელიც ნატურალიზებულ რუსეთის მოქალაქეებს სამხედრო სამსახურის გავლას ავალდებულებს. იმათ, ვინც არ დაემორჩილება კანონს, შესაძლოა მოქალაქეობა ჩამოართვან. ...