რუსეთის კურსკის, ბრიანსკისა და ბელგოროდის ოლქებში, რომლებიც უკრაინას ესაზღვრება, კონტრტერორისტული ოპერაციის რეჟიმი გამოაცხადეს. ამის შესახებ რუსეთის ანტიტერორისტული კომიტეტი იტყობინება. გადაწყვეტილება მიღებულია პასუხად კიევის მხრიდან „რუსეთის რამდენიმე რეგიონში ვითარების დესტაბილიზაციის მცდელობაზე“ და „ტერაქტების საფრთხის აღსაკვეთად“. ასევე ნახეთ კურსკის შეტევა: როგორ გადავიდა ომი რუსეთის ტერიტორიაზე კანონის თანახმად, კონტრტერორისტული ოპერაცია ხელისუფლებას უფლებას აძლევს, შეამოწმოს მოქალაქეები, მოისმინოს მათი სატელეფონო საუბრები, გაუთიშოს ინტერნეტი და მობილური კავშირი, სახლებიდან გაასახლოს მცხოვრებლები, შევიდეს მათ სახლებში და დაშალოს ავტომობილები. კურსკის ოლქში 6 აგვისტოდან გრძელდება საბრძოლო მოქმედებები მას შემდეგ, რაც იქ უკრაინის არმია შევიდა. რეგიონში ფედერალური მასშტაბის საგანგებო ვითარება გამოცხადდა. უკრაინის სამხედროები აცხადებენ, რომ კონტროლი დააწესეს ქალაქ სუჯაზე. სუჯის მერი ამას უარყოფს. რუსეთის თავდაცვის სამინისტრო ირწმუნება, რომ აკონტროლებს ვითარებას. ...