გურიაში „ქურდულ სამყაროსთან” კავშირის ბრალდებით 2 პირი დააკავეს - ამის შესახებ ინფორმაციას შინაგან საქმეთა სამინისტრო აქვეყნებს. "ქურდული სამყაროს“ წევრობისთვის დაკავებულია წარსულში ნასამართლევი, 25 წლის გ.ი. - მეტსახელად „ჯავა“, ხოლო "ქურდული სამყაროს" საქმიანობის მხარდაჭერისთვის - 23 წლის ნ.ყ. - წარსულში მრავალჯერ ნასამართლევი. „გამოძიებით დადგინდა, რომ დაზარალებულმა ც.მ.-მ ერთ-ერთი ონლაინკაზინოს მეშვეობით დიდი რაოდენობით თანხა მოიგო, რაც ცნობილი გახდა ბრალდებულებისთვის. გ.ი.-მ და ნ.ყ.-მ, მატერიალური სარგებლის მიღებისა და ,,ქურდულ სამყაროში“ ძალაუფლების განმტკიცების მიზნით განიზრახეს ც.მ.-სთვის ,,ქურდული გარჩევა“ მოეწყოთ, რომელსაც ესწრებოდა მისი ნათესავი რ.ა.“, - იტყობინება შს სამინისტრო. ამავე წყაროს თანახმად, პროცესში ჩართული იყო „კანონიერ ქურდი“ დ.ე. ,,ქურდული გარჩევის“ შედეგად, დაზარალებულს 5000 ლარის გადახდა დააკისრეს. თანხა მისმა ნათესავმა გადაიხადა. გამოძიება საქართველოს სისხლის სამართლის კოდექსის 223-ე პრიმა მუხლის პირველი ნაწილით და 223-ე ტერცია მუხლის მე-2 ნაწილით მიმდინარეობს. დანაშაულები 10 წლამდე ვადით თავისუფლების აღკვეთას ითვალისწინებს. ...