ბელგოროდის რაიონის სოფელ ბერეზოვკაში რუსულმა ტანკმა სამოქალაქო მანქანას გადაუარა, რის შედეგადაც დაიღუპა 73 წლის ადგილობრივი მკვიდრი კონსტანტინე ლოპატინი, რომელიც მანქანას მართავდა. ინციდენტის თვითმხილველებმა ბელგოროდის გამოცემა „პეპელს“ აცნობეს, რომ ავტომობილი „ნივა“ მოძრაობდა მთავარ გზაზე, იცავდა საგზაო მოძრაობის წესებს, ხოლო ამ დროს ტანკი მოსახვევიდან გამოვარდა და არ დაუთმო გზა ავტომობილს. თვითმხილველების თქმით, ტანკის ეკიპაჟის წევრები „უგონო მდგომარეობაში იყვნენ“. რუსეთის თავდაცვის სამინისტროსა და პოლიციაში მომხდარზე კომენტარი არ გაუკეთებიათ. მაგრამ გამოცემა „პეპელის“ ინფორმაციით, პენსიონერ ლოპატინის გარდაცვალების მიზეზად ოფიციალურ დოკუმენტებში მითითებულია „გულის შეტევა“. უკრაინის მოსაზღვრე რუსეთის ბელგოროდის რეგიონი, რომლის ტერიტორიიდან რუსული ჯარები ქალაქ ხარკოვსა და ხარკოვის რეგიონს ესხმიან თავს, რეგულარულად იბომბება დრონებიდან და არტილერიიდან. ომის დროს დაღუპული ადგილობრივი მოსახლეობის რაოდენობა რამდენიმე ასეულს შეადგენს. ათასობით ადამიანი კი იძულებული გახდა დაეტოვებინა საცხოვრებელი ადგილი და რუსეთის სიღრმეში, უსაფრთხო ტერიტორიაზე გადასულიყო. ...