უკრაინის საგარეო საქმეთა მინისტრი დმიტრო კულება პეკინში ჩავიდა. ეს ჩინეთში მისი პირველი ვიზიტია უკრაინაში რუსეთის სრულმასშტაბიანი შეჭრის დაწყების შემდეგ. კულებას მოლაპარაკებების მთავარი თემაა ჩინეთის შესაძლო როლი ომის დასრულებაში. სამდღიანი ვიზიტი 23 ივლისს დაიწყო. დმიტრო კულება მისმა ჩინელმა კოლეგამ, ვან იმ მიიწვია. ვიზიტის დეტალების შესახებ ცოტა რამ არის ცნობილი. თუმცა იტყობინებიან, რომ მხარეები მოლაპარაკებებს გამართავენ იმის თაობაზე, თუ რა გზები შეიძლება გამოინახოს გაჭიანურებული ომის დასრულებისთვის. „დისკუსიის მთავარი საკითხი იქნება გზების ძიება რუსეთის აგრესიის შესაწყვეტად და ჩინეთის შესაძლო როლი სტაბილური და სამართლიანი მშვიდობის მისაღწევად“, - განაცხადა უკრაინის საგარეო საქმეთა სამინისტრომ კულებას ვიზიტის წინ. ასევე ნახეთ ვის რა უნდა მშვიდობასთან ერთად? მრავალი მიმომხილველის აზრით, კულებას ვიზიტი ჩინეთში მოულოდნელი იყო იმის გათვალისწინებით, რომ ჩინეთს ახლო ურთიერთობები აქვს მოსკოვთან და ჩინეთის დიპლომატები ხშირად დისტანციას ამჯობინებენ უკრაინის მაღალი რანგის დიპლომატებთან ურთიერთობაში. ...